Саха сиригэр өссө 17 киһи коронавирус дьаҥыгар сутулунна, ол иһигэр Дьокуускайга — 14 киһи. Бу туһунан Ил Дархан Айсен Николаев бүгүҥҥү брифинигэр иһитиннэрдэ.
Айсен Николаев: «Дьокуускайга бүгүн эбии 14 киһи коронавирус дьаҥыгар сутуллубута билиннэ. Ол гынан, ыарыы туруоҕуттан уопсайа 183 киһи ыарыйда. 25 киһи балыыһаттан үтүөрэн таҕыста, бэҕэһээ сэттэ киһи үтүөрбүтэ. Хомойуох иһин, икки киһи тыына быһынна — ИВЛ-аппаракка холбонон сыппыт 85 саастаах дьахтар уонна 66 саастаах эр киһи. Бу күннэргэ саастаах чугас дьоҥҥутун харыстааҥ, сиэннэри, ыаллары кытта хантаактаһыннарымаҥ. 65-ттэн үөһээ саастаахтарга бу ыарыы олус кутталлаах.
Саха сиригэр 17 киһи ыарыйда, ол иһигэр Дьокуускайга бүтэһик сууккаҕа 14 киһи коронавирустаата. Бары эрдэ ыалдыьбыт дьону кытта хантаактаспыт дьон ыарыйда. Куораппытыгар балаһыанньа уустугурда. Онон, булгуччу мааскалаах сылдьыыны, дьиэҕэ хааччахтанан олорууну тутуһар күүскэ уолдьаста. Куорат былаастара бу хайысханан үлэлэрин күүһүрдэллэрин ирдиибит, мэдиссиинэ тэрилтэлэрин үлэлэрэ күүһүрдэ. Ол эрээри, бастатан туран, барыта олохтоохтортон тутулуктаах».
edersaas.ru