Балаҕан ыйын 30 күнүнээҕи туругунан, өрөспүүбүлүкэҕэ эпидемиологическай балаһыанньа уустугуран иһэр. Ааспыт суукка иһигэр 85 киһи коронавируһунан ыалдьыбыта билиннэ.
Ол иһигэр: Дьокуускайга – 47, Мииринэйгэ – 9, Алдаҥҥа – 7, Аммаҕа, Нерюнгригэ – 4-түү, Үөһээ Бүлүүгэ, Өлүөхүмэҕэ – 3-түү, Өймөкөөҥҥө, Ленскэйгэ, Мэҥэ Хаҥаласка – 2-лии, Өлөөҥҥө, Хаҥаласка – 1-дии киһи ыарыйда.
Биир киһи тыына быһынна. Суукка иһигэр 3892 анаалыс оҥоһулунна.
Үөһээ Бүлүүгэ уонна Бүлүүгэ обсерватордар үлэлииллэр. Хантаактаспыт дьону булан, хааччахтаныы эрэсиимигэр олортулар. ИДьМ геолокация көмөтүнэн эрэсиими кэспит дьону булан, өрөспүүбүлүкэтээҕи суһал ыстаапка хас күн аайы отчуоттуур. Маннык кэспит дьон элбэҕэ суохтар эрээри, кинилэрдиин өйдөтөр-сэрэтэр үлэ ыытыллар диэн суһал ыстаап салайааччытын солбуйааччы Ольга Балабкина иһитиннэрэр.
Ыарыы ахсаана элбээн иһэринэн, Ил Дархан Айсен Николаев 65-рин ааспыт дьону күһэйэн үлэлэтэр буоллахтарына, үлэни биэрээччилэр административнай эппиэтинэскэ тардыллыахтарын сөбүн туһунан ыйааҕа тахсыбыта. Бу ымпыгын-чымпыгын барытын үлэ, социальнай сайдыы министиэристибэтэ быһаарыахтаах.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.