Муус устар 16 күнүгэр өрөспүүбүлүкэҕэ 49 киһи, ол иһигэр Дьокуускайга 33 киһи саҥа коронавируснай инфекциянан ыарыйда диэн доруобуйа харыстабылын миниистирин бастакы солбуйааччы Алексей Яковлев иһитиннэрдэ.
Саамай элбэх киһи Алдаҥҥа — 3, Мэҥэ Хаҥаласка – 2, уонна кэккэ улуустарга 1-дии киһи ыалдьыбыт. Алексей Аммосович ыарыы ахсаана кэнники күннэргэ эбиллэн иһэр диэн бэлиэтээтэ. Онон өрөспүүбүлүкэтээҕи суһал ыстаап ыам ыйынааҕы бырааһынньыктар кэмнэригэр хааччахтааһын миэрэлэрин кытаатыннарар туһунан быһаарыыны ылынарга бэлэмнэнэр. Ону тэҥэ, ковидынан ыалдьыбыт дьоҥҥо куойка ахсаанын элбэтэргэ быһаарыныы ылынна. Билигин өрөспүүбүлүкэ үрдүнэн 30%, Дьокуускайга 20% саппаас куойка баар.
Билигин өрөспүүбүлүкэ үрдүнэн 647 киһи, ол иһигэр 72 оҕо эмтэнэ сылдьаллар.
Интэриэһинэйэ диэн, ыалдьыбыт дьонтон саамай элбэх киһи 18-25 саастаах эбит. Сүрүннээн атыы-эргиэн үлэһиттэрэ ыалдьаллар, бу бэйэни харыстаныы эрэсиимэ сымнаабытыттан төрүөттээх диэн Алексей Яковлев эттэ.
Ангелина Васильева, “Саха сирэ” хаһыат, edersaas.ru