Муус устар 28 күнүнээҕи туругунан, коронавируһунан 88 киһи, ол иһигэр Дьокуускайга 52 киһи ыалдьыбыт. Онон ыалдьыы 64%-нан эбиллибит. Өрөспүүбүлүкэҕэ эпидемиологическай балаһыанньа уустугуран иһэр диэн доруобуйа харыстабылын миниистирэ Елена Борисова брифиҥҥэ иһитиннэрдэ.
Барыта 8 улууска коронавируһунан ыалдьыы бэлиэтэнэр. Саамай элбэх – 10 киһи Тааттаҕа, Мэҥэ Хаҥаласка — 9, Чурапчыга — 7, Кэбээйигэ — 4, Ньурбаҕа— 3, Бүлүүгэ, Нерюнгригэ, Хаҥаласка — 1-дии ыалдьыбыт. Суукка иһигэр 2497 анаалыс оҥоһуллубут. Пандемия саҕаланыаҕыттан барыта 1 мөлүйүөнтэн тахса анаалыс оҥоһуллубут.
Билигин улахан болҕомто быһыыны биэрэргэ ууруллар диэн миниистир бэлиэтээтэ. Ол курдук, өрөспүүбүлүкэҕэ 42 мэдиссиинэ тэрилтэтэ, 244 пуун быһыыны биэрэргэ үлэлииллэр. 119 мобильнай биригээдэ үлэлиир. Барыта 114 тыһыынча устуука коронавируһу утары быһыы кэлбитэ. Бу — “ЭпиВакКорона” уонна “Спутник” вакциналар.
Ангелина Васильева, “Саха сирэ” хаһыат, edersaas.ru