Доруобуйа

Коронавируһунан ыалдьааччы ахсаана элбээтэ

Өрөспүүбүлүкэҕэ  санитарнай-эпидемиологическай быһыы-майгы тыҥааһыннанан турар. Ааспыт сууккаҕа СӨ Роспотребнадзорун управлениетын дааннайынан, 163  киһи  коронавирустаабытын туһунан бүгүн СӨ Бырабыыталыстыбатын бэрэссэдээтэлин солбуйааччы Ольга  Балабкина иһитиннэрдэ.

Итинтэн Дьокуускай куоракка 93, Аммаҕа 10, Алдаҥҥа 8, Мэҥэ Хаҥаласка, Мииринэйгэ 6-лыы, Нерюнгригэ, Өлүөхүмэҕэ, Уус Маайаҕа, Хаҥаласка 5-тии, Булуҥҥа, Бүлүүгэ, Ленскэйгэ, Муомаҕа, Намҥа, Чурапчыга 3-түү, Кэбээйигэ, Сунтаарга биирдии киһи ыалдьыбыт.

Ольга Балабкина коронавируһунан ыалдьыы элбээһинин сүрүннээн оскуолаларга, орто анал уонна үрдүк үөрэх тэрилтэлэригэр үөрэх саҕаламмытын кытта сибээстиир.  Өрөспүүбүлүкэ олохтоохторугар санитарнай- эпидемиологическай ирдэбиллэри уонна Ил Дархан Айсен Николаев Ыйааҕынан туруоруллубут дьаһаллары тутуһарга ыйда. Чуолаан, социальнай дистанцияны тутуһууга сэргэ, кэллиэгэлэрин уонна аймахтарын  кытта элбэхтик алтыһан үлэлиир  дьон тустаах быһыыны ылалларыгар  ыҥырда.

Ааспыт сууккаҕа  өрөспүүбүлүкэ лабораториялара 4 153 тест-чинчийиини ыыппыттар. Пандемия саҕаланыаҕыттан барыта 1 384 532 тест оҥоһуллубут. Саха сиригэр бу күннэргэ  485 155 доза вакцина  аҕалыллыбыт.  Аҕалыллыбыт дозаттан 69,5 %-на бэриллибит. Бастакы дозаны 331 281 киһи ылбыт.

 

edersaas.ru

0
0