Дьокуускайга дьон коронавируснай инфекцияҕа иккистээн сыстыбыт түбэлтэлэрэ таҕыста. Ол туһунан Өрөспүүбүлүкэтээҕи килиниичэскэй балыыһа кылаабынай бырааһын солбуйааччы Ньургуйаана Владимирова социальнай ситимнэргэ быһа эпиир кэмигэр иһитиннэрдэ.
— Биһиэхэ дьон коронавируснай инфекциянан иккистээн сыстыбыт хас да түбэлтэлэрэ бигэргэннэ. Коронавируһунан ыалдьыбыттарын кэннэ “антитела” үөскээн баран, түөрт ый кэриҥэ организмҥа сылдьаллар. Ол эрээри, сороҕор “антитела” таһыма эмискэ түһэн хаалар уонна бу киһи ый буолаат, иккистээн ыалдьар. Маннык хас да түбэлтэ буолла, — диэн кини эттэ.
Онон ыалдьыбыт дьон ыһыктынан кэбиспэккэ, өссө күүскэ харыстаныахтаахтар, организм чөлүгэр түһэригэр кыһаллыахтаахтар. Быраас эппитинэн, иккистээн киирэригэр ыарыы мөлтөөбүт организмы өссө күүскэ ыарытыннарыан сөп.
Санатар буоллахха, билигин сүүсчэкэ киһи ыарахан туруктаах, ол иһигэр 29 киһи ИВЛ аппарааттаах сытар.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн