Коронавируһу утары ылыллыбыт миэрэлэри кэһээччилэр эппиэккэ тардылыннылар

Киин куорат суһал ыстаабын холбоһуктаах бөлөҕө Дьокуускайга эргиэн, ас астыыр, өҥө оҥорор, үөрэҕирии тэрилтэлэрэ коронавируһу утары ылыллыбыт санитарнай нуормалары тутуһалларын кэтээн рейдэлэри оҥорорун тохтоппот.

edersaas.ru

Суһал ыстаап бөлөҕө ИДьМ «Якутское» салаатын кытта киин куорат 13 сынньалаҥ тэрилтэтин хонтуруоллаан кэрийдилэр. Ол түмүгэр,  нуорманы кэһии сэттэ түбэлтэтэ көһүннэ, алта буруйдаахха боротокуол толорулунна. Ол курдук, Чкалов уулуссатыгар турар көҥүлэ суох арыллыбыт «barDREAM» бар, «Queen» караоке-бар, көҥүлэ суох үлэлии турбут «Chillout» кулууп, «VGOSTY» кулууп элбэх санитарнай кэһиилээх үлэлииллэрэ билиннэ. Бу тэрилтэлэр Ил Дархан ыйааҕын кэһэн, 00.00 кэнниттэн үлэлии тураллара быһаарылынна.

«Мята LOUNGE» диэн ааттаах тэрилтэ эмиэ 00:00 кэнниттэн үлэлиирэ биллибит,аан иһиттэн хатааһыннаах эбит.

Ытыктабыллаах куорат олохтоохторо! Тырааныспарга, дьон түмсэр сиригэр коронавируһу утары ылыллыбыт миэрэлэри кэһии түгэнин көрдөххүтүнэ, уокуруктааҕы дьаһалта төлөпүөнүгэр эрийэн биллэрэргитигэр көрдөһөбүт: 31-90-90.

«Саха сирэ» хаһыат, edersaas.ru

Хаартыска sakha.gov.ru