Өрөспүүбүлүкэҕэ коронавируһу утары охсуһууга 662 куойка тэрилиннэ. Доруобуйа харыстабылын министиэристибэтэ иһитиннэрбитинэн, Дьокуускайга 100 куойкалаах инфекционнай балыыһа, пульмонологическай стационар уонна 170 куойкалаах провизорнай госпиталь үлэлииллэр. Бу балыыһалар туспа турар дьиэҕэ бааллар.
Ленскэйгэ 18 миэстэ оннугар 50 куойкалаах балыыһаҕа билиҥҥитэ 34 киһи эмтэнэр. Алдаҥҥа куойка ахсаанын 80-ҥа диэри элбэппиттэрэ, онно билигин 45 киһи эмтэнэр.
Балыыһалар бары коронавируһу эмтииргэ аналлаах тэриллэринэн хааччыллыбыттар. Ол курдук, саҥа кэлбит 12 ИВЛ-аппараата Алдан, Нерюнгри, Ленскэй, Мэҥэ Хаҥалас, Амма улуустарынан тарҕатыллыбыттара. Ону тэҥэ, Юрий Трутнев дьаһалынан, Нерюнгригэ 1,5 тыһыынча харыстанар көстүүмү, 75 тыһыынча маасканы тиэрдибиттэрэ.
Ыам ыйыгар Саха сиригэр эбии 8,1 тыһыынча харыстанар көстүүм, 29,2 тыһыынча респиратор, 11,8 тыһыынча ачыкы, 16,2 тыһыынча паара бэрчээкки кэлиэхтээх.
Ангелина Васильева, “Саха сирэ” хаһыат, edersaas.ru
Хаартыска: gazeta.ru
+1
+1
+1
+1
+1
+1
+1