Коронавируһу быһаарыы үлэтэ

Өрөспүүбүлүкэҕэ коронавирус дьаҥын быһаарарга 11 лаборатория үлэлиир. Итинтэн 2 — доруобуйа харыстабылын федеральнай судаарыстыбаннай тэрилтэтин иһинэн «Саха Өрөспүүбүлүкэтигэр чэбэр буолуу уонна дьаҥы чинчийии киинигэр», атыттар — «Өрөспүүбүлүкэтээҕи 3 №-дээх килиниичэскэй балыыһа» СӨ САТ, «Саха сиринээҕи СПИД-и утары охсуһар уонна сэрэтэр үлэни ыытар өрөспүүбүлүкэтээҕи киин», «Мэҥэ Хаҥаласка улуустааҕы киин балыыһа», «Өрөспүүбүлүкэтээҕи килиниичэскэй балыыһа», «Искэни эмтиир өрөспүүбүлүкэтээҕи диспансер» СБТ бааллар. Бу кэм устатыгар лабораторияларга 157 376 киһини чинчийдилэр, биир сууккаҕа 3000-тан тахса тиэһи оҥороллор диэн СӨ Доруобуйа харыстабылын министиэристибэтин пресс-сулууспата иһитиннэрэр.

Быйыл от ыйын 1 күнүттэн «Облачная поликлиника» диэн телемэдиссиинэ тиһигэ киллэриллэн, куйаар ситиминэн (онлайн-сүбэ) сүбэлэр бэриллэллэр уонна киһи доруобуйатын туруга хонтуруолланар кыахтаныа. Дьоҥҥо-сэргэҕэ табыгастаах буоларын курдук, «Облачная поликлиника»  мобильнай сыһыарыынан СӨ Доруобуйа харыстабылын министиэристибэтин дааннайдары оҥорор кииниттэн электроннай мэдиссиинискэй карталар ыытыллаллар. Ону сэргэ, киһиэхэ уонна мэдиссиинэ тэрилтэлэригэр ПЦР, ИФА  лабораторнай чинчийиилэр түмүктэрин «Облачная поликлиника» нөҥүө уонна «er14.ru» порталга пациент тус кабинетыгар ыытарга холбуур кыах көрүллэр. Чугастааҕы күннэргэ мэдиссиинэ тэрилтэлэригэр уонна «СӨ чэбэр буолуу уонна дьаҥы чинчийии киинигэр» анализатордар лабораторнай информационнай тиһиккэ холбонуохтара.  «Облачная поликлиника» мобильнай сыһыарыыга уонна «er14.ru» порталга пациент тус кабинетыгар лабораторнай чинчийиилэр түмүктэрэ кэллэҕинэ, гражданиҥҥа push-иһитиннэрии смс-нан тиийэр. Бу лабораторияттан кэлбит анаалыс түмүгүн киһиэхэ тус бэйэтигэр уонна мэдиссиинэ тэрилтэтигэр тиэрдэргэ түргэн буолуоҕа.

«Облачная поликлиника» мобильнай сыһыарыы Google Play уонна App Store хачайдыахтарын сөп. Сыһыарыы туһунан уонна ссылканы смартфоҥҥа хайдах ылар туһунан сиһилии иһитиннэриини  https://tm.mzsakha.ru киирэн ааҕыҥ.