Доруобуйа Уопсастыба

Коронавируһу бохсууга кэккэ соруктары туруоруохтара

Бүлүү бөлөх улуустар коронавируһу бохсууга үлэлиир суһал ыстааптара дьаҥы тарҕаппат уонна хаптатар туһугар, кэккэ соруктары туруоруохтара.

Өрөспүүбүлүкэ атын улуустарын кытары тэҥнээтэххэ, ити эҥэр оройуоннарга эпидемиологическай балаһыанньа бигэ. Ол гынан баран, бу сыстыганнаах дьаҥ эбиллибэтин туһугар, олохтоох салалталар быһыыны туруоруу тэтимин күүһүрдүөхтэрэ уонна наада буоллаҕына, олохтоох таһымҥа хааччахтааһыны киллэриэхтэрэ.
Бүгүн, тохсунньу 22 күнүгэр, Айсен Николаев Үөһээ Бүлүүгэ өрөспүүбүлүкэтээҕи суһал ыстаап мунньаҕын ыытта. Видеонан ыытыллыбыт мунньахха эрэгийиэн баһылыга Бүлүү бөлөх улуустарга эпидемиологическай балаһыанньаны билистэ, быһыыны туруоруу хаамыытын сыаналаата уонна суһал соруктары туруорда.
«Өрөспүүбүлүкэ атын оройуоннарыгар уонна Дьокуускай куоракка курдук, Бүлүү бөлөх улуустарга быһыы-майгы оннук тыҥааһына суох. Ол гынан баран, кэнники нэдиэлэҕэ ыалдьааччы ахсаана эбиллибитэ көстөр. Бүлүү, Ньурба улуустарыгар ыалдьааччы уопсай ахсаана 2-3 төгүл улаатта. Балаһыанньа Сунтаарга уустук, ол гынан баран,  бырыһыанынан көрдөххө, Үөһээ Бүлүүгэ саамай үрдээһин бэлиэтэнэр«, — диир Николаев.
Кини бу эҥээр улуустар баһылыктарыгар коронавируһу утары быһыыны биэриини уонна ревакцинацияны күүһүрдэргэ соруйда, итиэннэ эпидемиологическай балаһыанньа быһыыны туруоруу биэрии тэтимиттэн тутулуктааҕын санатта. Кини вакцинация бастакы компоненын ылыы көрдөрүүтэ Ньурба уонна Бүлүү оройуоннарыгар үчүгэйин, манна нэһилиэнньэ улахан дьонун 80% быһыыны ылбытын, бу икки оройуоҥҥа эпидемиологическай быһыы-майгы арыый бигэтик турарын бэлиэтээтэ.
Айсен Николаев доруобуйа харыстабылын эбийиэктэрэ тохтоло суох үлэлиири хаачыйалларыгар, эпидемиологическай быһыыттан-майгыттан көрөн эбии хааччахтааһыҥҥа, ол иһигэр ыраахтан олорон үөрэнии боппуруоһун суһаллык быһааран иһэллэригэр соруйда.
«Өрөспүүбүлүкэҕэ ыалдьааччы ахсаана эбиллэ турар. Балаһыанньа түргэнник уларыйа турар кэмигэр, үөскээбит боппуруоһу оройуон ыстаабын таһымыгар түргэнник быһааран, дьаҥ тарҕаныытын бытаардар диир буоллаххытына, бэйэҕит эппиэтинэскитигэр ылынан туран олохтоох таһымҥа эбии хааччахтааһыннары киллэрэн иһэргит наада. Бу тэрилтэлэр үлэлэригэр, үөрэх кыһалара дистанционнайга көһөллөрүгэр эмиэ сыһыаннаах. Хомойуох иһин, дьаҥ бу долгунугар оҕолор, улааппыт оҕолор ордук ыалдьаллар. Оҕолор ыалдьыылара 30%-тан эрэ кыра«, — диэн бэлиэтиир Ил Дархан.
Ураты хонтуруолга атын улуустартан, Дьокуускай куораттан, ону сэргэ өрөспүүбүлүкэ таһыттан кэлээччилэри, ол иһигэр дистанционнай үөрэххэ көһөн дьиэлэригэр төннөр устудьуоннары ылалларыгар соруйда. Ил Дархан, маны сэргэ, эминэн-томунан, коронавируһу бэрэбиэркэлииргэ теһинэн хааччыллыыны кэтээн көрөргө дьаһал биэрдэ. Ордук улахан болҕомтону кыра нэһилиэнньэлээх пууннарга уурарга эттэ.
«Вируһу утары препаратынан (противовируснай) дьон кыһалҕата суох хааччыллар кыахтаах буолуохтаах. Бу оройуон кииннэригэр эрэ буолбакка, саамай ыраах нэһилиэнньэлээх пууннарга кытары. Туох баар мэдиссиинэ тэрилтэлэригэр ирдэнэр көмө оҥоһулларыгар көрдөһөбүн. Боппуруос манна араас – колл-кииннэр үлэлэриттэн саҕалаан тырааныспарынан хааччыйарга тиийэ«, — диэтэ кини.
Андрей Сорокин (СИА) хаартыскаҕа түһэриитэ
0
0
Telegram @edersaas20