Коронавирус дьаҥыттан харыстанарга, бу уодаһыннаах дьаҥы тарҕаппат, бохсор туһуттан, мааскалары, көстүүмнэри тигиигэ өрөспүүбүлүкэ урбаанньыттара, ательелар, биирдиилээн дьон, тэрилтэлэр кыахтара тиийэринэн бары ылсыбыттара.
Тикпит мааскаларын балыыһа үлэһиттэригэр, обсерватордарга, волонтердарга, 65-тэн үөһээ аҕам саастаахтарга сорохтор көмө быһыытынан биэрбиттэрэ, сорохтор атыылаабыттара. Дьаҥы бохсорго өрөспүүбүлүкэ таһыттан, Дьокуускайтан урбаанньыттар, биирдиилээн дьон төрөөбүт улуустарыгар мааскалары, дезинфекциялыыр сириэстибэлэри ис сүрэхтэриттэн көмөлөһөн, буор босхо ыыталаан дьоннорун-сэргэлэрин улаханнык үөрдүбүттэрэ.
Дьокуускай куоракка «Заря» инбэлииттэр иистэнэр сыахтара дьаҥтан харыстанар мааскалары, сыстыганнаах ыарыыттан көмүскүүр анал көстүүмнэри тигэллэрин туһунан тэрилтэ салайааччыта Николай Местников иһитиннэрдэ. Ол курдук, элбэхтэ кэтиллэр 7000 мааска тигиллибит. Мааскаларын сыаната 60 солкуобай. Маны сэргэ, 38 устуука тэллэҕи (баата), 120 — тэллэх хаҕын, биир оччо ахсааннаах сыттыгы, 250 — утуйар таҥас кэмпилиэгин, дьаҥтан харыстанан кэтэргэ 24 анал көстүүмү, 14 — мэдиссиинэ халаатын үлэх быһыытынан тикпиттэр. Балар Дьокуускайдааҕы килиниичэскэй, өрөспүүбүлүкэтээҕи 2-с №-дээх суһал көмө, Бүлүү улууһун киин балыыһаларыгар, Дьокуускайдааҕы 1 №-дээх поликлиникаҕа, мааскалар тэрилтэлэринэн тиэрдиллибиттэр.
Оттон СӨ Урбаан, атыы-эргиэн уонна туризм министиэристибэтэ, муус устар иккис аҥаарыгар өрөспүүбүлүкэҕэ уопсайа сүүрбэччэ тэрилтэ биир күҥҥэ 7,3 тыһыынча элбэхтэ кэтиллэр маасканы тикпитин иһитиннэрдэ диэн СИА суруллар. Кулун тутар 18 күнүттэн муус устар 24 күнүгэр диэри өрөспүүбүлүкэ үрдүнэн барыта 200 тыһыынчаттан тахса мааска тигиллибитэ бэлиэтэнэр.
edersaas.ru
Хаартыска Николай Местников тиксэриитэ