Өрөспүүбүлүкэҕэ коронавируһунан ыалдьыы ахсаана киин куораты таһынан, өрөспүүбүлүкэ улуустарыгар элбээбитэ бэлиэтэннэ.
edersaas.ru
Кэнники нэдиэлэҕэ Саха сиригэр Ковид-19 ыарыы 3,3%, Дьокуускайга 8,4% элбээтэ. Бүтэһик сууккаҕа ыалдьыбыт киһи ахсаана 64 буолла.
Ыарыы элбиир түгэнигэр Саха сиригэр мааска кэтиллэр эрэһиимин эмиэ киллэриэхтэрин сөп.
Инфекционистар сабаҕалыылларынан, күһүн оскуолалар аһыллыыларын, уоппускаттан дьон араас дойдуттан кэлэрин диэки ыарыы элбиэн сөп. Тоҕо диэтэххэ, коронавирус, биллэрин курдук, респираторнай инфекция, дьыл кэмиттэн тутулуга суох, хаһан баҕарар баарын биллэриэн сөп. Ол да иһин, Арассыыйа хас да олохтооҕор «Кентавр» диэн ааттаммыт омикрон-штама булуллубута болҕомтоҕо ылылынна.
Дьон элбэхтик сылдьар сиригэр маасканы кэтии ханнык баҕарар респираторнай ыарыы бэриллэр кутталын аҕыйатар. СӨ Роспотребнадзор управлениета сайыҥҥы кэмҥэ ковид-19 тарҕанар куттала син биир баарын санатар.
Ковид араас көрүҥэ ааспытын кэннэ оҥоһуллубут чинчийиилэр көрдөрөллөрүнэн, быһыыны ылыыны сэргэ, маасканы кэтии улахан оруолу ылар. Дойдуга вирус букатыннаахтык сүппэтэҕинэн, саҥа мутациялар баалларынан, элбэх киһи сылдьар сиригэр уонна уопсастыбаннай тырааныспарга маасканы кэтии, илиини суунуу, дезинфекциялыыр сириэстибэлэри туттуу суолталара сүппэт.
Санатан эттэххэ, Доруобуйа харыстабылын аан дойдутааҕы тэрилтэтэ коронавирус алтыс долгуна кэлиэн сөбүнэн, дойдуга барытыгар мааска эрэһиимин киллэрэргэ ыҥырда.
Надежда ЕГОРОВА, «Саха сирэ» хаһыат, edersaas.ru