Сарсыҥҥыттан, балаҕан ыйын 5-тэн, “Триумф” Спорт киинигэр саҕаланар Саха АССР, РСФСР, ССРС үтүөлээх тириэньэрэ Дмитрий Коркин кэриэһигэр XI норуоттар икки ардыларынааҕы Гран-при турнирга отучча судаарыстыба бөҕөстөрө кытталлар. Бу туһунан күрэхтэһиини тэрийээччилэр иһитиннэрдилэр.
Бу иннинээҕи уон күрэхтэһиигэ барыта 292 мэтээл оонньоммута. Күн бүгүн Дмитрий Коркин турнирын үс төгүллээх кыайыылааҕын үрдүк аатын Виктор Рассадин (2014, 2015, 2017), Александр Богомоев (2011, 2012, 2014) итиэннэ Юрий Белоновскай (2009, 2016, 2017) чиэстээхтик сүгэллэр.
Оттон Леонид Спиридонов, Иннокентий Иннокентьев, Владислав Андреев, Виктор Рассадин (Саха сирэ), Сат Опан (Тыва), Сослан Кцоев, Ацамаз Санакоев (Осетия), Батраз Газзаев (Кемерево) уонна Евгений Жербаев (Бурятия) норуоттар икки ардыларынааҕы түһүлгэ иккилии кыһыл көмүс мэтээллэрин хаһаайыннарынан буолаллар.
Саамай элбэх мэтээли – түөртүүнү – сэттэ бөҕөс ылан турар: Саха сириттэн Виктор Рассадин (3 кыһыл көмүс, 1 үрүҥ көмүс), Иннокентий Иннокентьев (2 кыһыл көмүс, 2 үрүҥ көмүс), Семен Семенов (1 кыһыл көмүс, 2 үрүҥ көмүс, 1 боруонса), Ньургун Скрябин (1 кыһыл көмүс, 3 боруонса), Егор Пономарев (1 кыһыл көмүс, 3 боруонса), Красноярскайтан Мурад Нукхадиев (1 кыһыл көмүс, 3 боруонса) Монголияттан Пурэвжав Унурбат (1 үрүҥ көмүс, 3 боруонса).
Роман Попов, edersaas.ru
Хаартыска Интэриниэттэн ылылынна.