Дьокуускайга алтынньы 14-17 күннэригэр Дмитрий Коркин аатынан көҥүл тустууга норуоттар икки ардыларынааҕы турнир ыытыллыаҕа. Быйылгы турнир Павел Пинигин, Роман Дмитриев уонна Александр Иванов 1976 сыллаахха Монреаллааҕы Олимпиадаҕа өрөгөйдөөбүттэрэ 45 сылыгар ананыаҕа. Бүгүҥҥү күҥҥэ 12 дойду сүүмэрдэммит хамаандата кыттарын биллэрдэ. Тэрээһин туох баар эпидемиологическай быраабылалары тутуһан ыытыллыаҕа диэн СИА иһитиннэрэр.
«Дмитрий Коркин аатынан турнирга үгэс курдук бастыҥ хамаандалар кытталлар. Билигин 12 дойду хамаандата кыттарын биллэрдэ. Аан дойду чөмпүйэнээтин кэнниттэн кыттааччы өссө элбиэҕэ диэн эрэнэбит. Бочуоттаах ыалдьыттары ыҥырдыбыт. Билиҥҥитэ күрэхтэһиибит көрөөччүлэрдээх ыытылларын туһугар Роспотребнадзору кытта үлэлии сылдьабыт, санитарнай боротокуол оҥоробут», — диэн СӨ Успуорка уонна физическэй култуураҕа миниистирин бастакы солбуйааччы Леонид Спиридонов этэр.
Ол курдук, турнирга Арассыыйа, Венгрия, Словакия, Белоруссия, Австралия, Македония, Польша, Казахстан, Узбекистан, Турция, Румыния, Куба уонна Украина хамаандалара кыттыахтара. Спортсменнар бары ПЦР-анаалыһы туттаралларын уонна быһыы ылбыттарын туһунан сэртипикээттээх буолалларын тэрийээччилэр ирдиэхтэрэ.
Күрэхтэһиигэ кыттар Саха сирин хамаандата Аллараа Бэстээххэ Манньыаттаах лааҕырга, Алдаҥҥа хайыһар баазатыгар, Владикавказка дьарыктаммыттара. Сүрүн хамаандаҕа баар тустууктарбыт бары күрэхтэһиэхтэрэ.
Турнир кыайыылаахтара 3000 долларынан, үрүҥ көмүс призердар 2000 долларынан, боруонса призердар 1000 долларынан наҕараадаланыахтара.
Мария Васильева (СИА) хаартыската.