Саха АССР, РСФСР, ССРС үтүөлээх тириэньэрэ Дмитрий Коркин кэриэһигэр норуоттар икки ардыларнааҕы XI турнирга анаммыт пресс-кэмпириэнсийэ “Триумф” Спорт киинигэр буолла.
Суруналыыстары кытта көрсүһүүгэ Тустуу холбоһуктаах эйэгэтин (UWW) бюротун чилиэнэ Ким Ик Джон, тэрилтэ техническэй дэлэгээттэрэ Вацлав Шайнер уонна Андрей Крикунов, күрэхтэһии кылаабынай судьуйата Владимир Секлецов, Саха сирин спортивнай тустууга федерациятын бэрэсидьиэнэ Семен Березин, “Саханефтегазсбыт” АУо генеральнай дириэктэрин солбуйааччы, турниры тэрийэн ыытар кэмитиэт бэрэссэдээтэлин солбуйааччы Виктор Лебедев кыттыннылар.
Кэпсэтиини арыйарыгар спорт миниистирэ Георгий Балакшин быйылгы турнирга 33 дойдуттан 263 спортсмен кыттарын, кинилэр ортолоругар олимпийскай чөмпүйүөн Сослан Рамонов, аан дойду хас да төгүллээх чөмпүйүөнэ, Олимпиада призера Франк Чамизо, Олимпийскай оонньуулар призердара Реи Хигучи курдук ааттаах-суоллаах бөҕөстөр баалларын, турнир бочуоттаах ыалдьыттарынан дойду спортивнай тустууга федерациятын бэрэсидьиэнэ Михаил Мамиашвили, Арассыыйа сүүмэрдэммит хамаандатын сүрүн тириэньэрэ Дзамболат Тедеев, Олимпийскай оонньуулар үс төгүллээх чөмпүйүөннэрэ Артур Таймазов, олимпийскай чөмпүйүөн, аан дойду биэс төгүллээх чөмпүйүөнэ Хаджимурат Гацалов, олимпийскай чөмпүйүөн Алан Хугаев, Олимпиада призера, аан дойду чөмпүйүөнэ Денис Царгуш, о.д.а.буолалларын ыйан туран, биһиги улуу тириэньэрбит Дмитрий Петрович төрөөбүтэ 90 сылыгар анаммыт түһүлгэ үрдүк таһымнаахтык ыытылларыттан астынабын диэтэ.
Кэпсэтии кыттыылаахтара Дьокуускайга ханнык баҕарар норуоттар икки ардыларынааҕы таһымнаах күрэхтэһиини тэрийэн ыытар кыах толору баарын бэлиэтээтилэр, турнир иитинэн ыытыллыбыт семинарга судьуйалар аан дойдутааҕы категорияҕа эксээмэн туттарыахтарын, уон икки хандьыдаат иһигэр икки Саха сирин судьуйата баарын эттилэр, Коркин 90 сылыгар анаммыт турнир саха тустууну сэҥээрээччилэригэр спорт дьиҥ-чахчы бырааһынньыгынан буолуоҕар эрэмньилээхпит диэтилэр.
Роман Попов
Ааптар хаартыскаҕа түһэриитэ.