Дойду Төрүт Сокуонугар эбии, уларытыы туһунан Бүтүн Арассыыйатааҕы куоластааһын тэрээһиннээхтик барарыгар “Конституция волонтердара” күүс-көмө буолаллар. Саха сиригэр тустаах штаб бэс ыйын 10 күнүттэн тэриллэн, күн бүгүн 1248 волонтер суолталаах хамсааһын ис хоһоонун быһаарарга турунна.
Кинилэртэн 150 “Конституция волонтера” Өлөөҥҥө үлэлиир. Баҕа өттүнэн кэлим куоластааһыны ыытыыга көмөлөһөөччүлэр Арассыыйатааҕы волонтердар ассоциацияларын киинин анал үөрэҕин ааспыттар, 12 модулунан дьарыктанан сэртипикээти ылбыттар. Онон нэһилиэнньэҕэ өйдөтөр-сырдатар үлэни ыытарга үөрүйэхтэммиттэр.
Волонтердар Конституцияҕа туох уларыйыы баарын быһаараллар, гражданнар куоластыыр күҥҥэ барыахтаах учаастактарын санаталлар. Үксүн аҕам саастаах дьоннуун “Мы вместе” диэн сыһыарыынан түлүпүөнүнэн эрийэн кэпсэтэллэр. Ол быыһыгар уопсастыбаннай миэстэлэргэ сырдатар матырыйааллары тарҕаталлар, холобура, Дьокуускай Ленин, Орджоникидзе, Доҕордоһуу болуоссатыгар күҥҥэ тоҕустуу волонтер олбу-солбу тахсан, нэһилиэнньэҕэ Конституцияны быһаараллар. Онно кинилэр стендэҕэ көрдөрө-көрдөрө ырыталлар, биитэр ааһан иһэр дьоҥҥо хаһыаттары, лоскуй ырытыылары биэрэллэр.
Ити курдук дойду кэскилигэр тулааһын буолар сүрүн докумуон саҥалыы бигэргэнэригэр “Конституция волонтердара” бэйэлэрин кылааттарын киллэрсэллэр.
Екатерина Аммосова, ulus.media саайтан.