Саха Өрөспүүбүлүкэтин Конституционнай сэбиэтин уопсастыбаннай-консультативнай кэллиэгийэтин бастакы мунньаҕа бэҕэһээ олунньу 9 күнүгэр буолан ааста.
Конституционнай сэбиэт Бэрэссэдээтэлэ Петр Гоголев бэлиэтээбитинэн, тэрээһин 1992 сыллаахха олунньу 7 күнүгэр «Конституционнай суут туһунан» сокуон тахсыытын кытта ыкса сибээстээх. Ол курдук, мунньах конституционнай хонтуруол тэриллибитин 30 сылыгар ананна.
Саха Өрөспүүбүлүкэтигэр конституционнай хонтуруол хойуккутун уонна билиҥҥитин туһунан сүрүн дакылааты юридическай наука доктора, Конституционнай суут урукку судьуйата Валерий Филиппов оҥордо. Кини Төрүт сокуон хонтуруолун сайдыытын туһунан сиһилии кэпсээтэ.
Салгыы XII ыҥырыылаах Үрдүкү Сэбиэтин дьокутаата, СӨ I ыҥырыылаах Ил Түмэнин дьокутаата, Конституционной суут урукку судьуйата Макар Яковлев, XII ыҥырыылаах Үрдүкү Сэбиэтин дьокутаата Анатолий Слепцов, Конституционнай суут бастакы бэрэссэдээтэлэ, СӨ конституционнай сүбэһитэ Дмитрий Миронов санааларын үллэһиннилэр. Кинилэр үлэлээн ааспыт Конституционнай суут өрөспүүбүлүкэ уонна Арассыыйа сайдыытыгар, сокуон, быраап өттүгэр дьоһун кылаатын киллэрбитин ыйдылар. Былырыын тэриллибит Сэбиэккэ сүбэ-соргу буоллулар.
Билигин Конституционнай сэбиэт суут уоргана буолбатах, кини сокуон барылларын үөрэтэр уонна сокуоннар итэҕэстэрин-быһаҕастарын туоратар туһугар этии киллэрэр бырааптах.
Салгыы кэллиэгийэ үлэтин торумнаатылар, былааннары кэпсэтистилэр.
Манна даҕатан эттэххэ, кулун тутар 30 күнүгэр, федеративный дуогабар баттаныллыбыта 30 сылыгар анаан, ХИФУ уонна юристар ассоциацияларын кытта Бүтүн Арассыыйатаҕы научнай-практическай конференцияларын ыытарга былаанныыллар эбит.
edersaas.ru