Москваҕа сэтинньи 16-17 күннэригэр Бүтүн Россиятааҕы кэпэрээссийэ сийиэһэ буолан ааста. Дойду улахан дьаһалыгар Саха Өрөспүүбүлүкэтиттэн бырабыыталыстыба бэрэссэдээтэлин бастакы солбуйааччы-тыа хаһаайыстыбатын уонна ас-үөл бэлиитикэтин миниистирэ Петр Алексеев салалтатынан сүүрбэччэ киһилээх бөлөх баран кыттан кэллэ.
Сийиэс өрөгөй түгэнигэр сийиэс дэлэгээтэ, өрөспүүбүлүкэ таһымыгар тэриллэн үлэлээбитэ эһиил саас 10 сылын туолар “СахаАгроПродукт” тыа хаһаайыстыбатын потребительскай хааччыйар-батарар кэпэрэтиибин төрүттэспит, атаҕар туруорбут бырабылыанньа бэрэссэдээтэлэ Константин Тимофеевка РФ тыатын хаһаайыстыбатын миниистирэ Александр Ткачев “Россия агропромышленнай комплексын бочуоттаах үлэһитэ” аат иҥэриллибитин туоһулуур докумуону уонна бэлиэни дохсун ытыс тыаһын ортотугар туттарда.
Василий НИКИФОРОВ, «Саха сирэ» хаһыат, edersaas.ru