Өрөспүүбүлүкэҕэ интернет сыаната кэлэр уон сыл иһигэр лаппа түһүө диэн Москваттан кэлэ сылдьар цифровой сайдыы, сибээс уонна маассабай коммуникация миниистирэ Константин Носков иһитиннэрдэ. Кини цифровой экономиканы олоххо киллэрии национальнай программа сүрүн боппуруостарын дьүүллэһэ Дьокуускайга кэлэ сылдьар.
edersaas.ru
Уһук хоту арктическай оройуоннарга ыарахан сыаналаах оптоволоконнай сибээс ситимин тардар төһө наадалааҕын, эбэтэр спутниковай сибээһи хаалларар хайата экономическай өртүнэн ордугун биэдэмистибэҕэ сыаналыылларын кэпсээтэ.
«Икки сүүс киһиэхэ интернет тардаары уонунан миллиард солкуобайы ороскуоттуубут, эбэтэр чэпчэки сыаналаах спутнигы үлэлэтэбит», — диэн тэҥнээн көрдө Константин Носков.
Бүгүҥҥү мунньах ис хоһоонун сырдатан, Ил Дархан э.т. Айсен Николаев экономика цифровой таһымҥа таҕыстаҕына, өрөспүүбүлүкэ дойду атын эрэгийиэннэриттэн бэйэтэ туһунан ойуччу сытар кыһалҕата быһаарыллыан сөбүн ыйда.
«Биһиги усулуобуйабытыгар материальнай бородууксуйаны оҥорон таһаары ороскуота атын эрэгийиэннэртэн таһыччы үрдүк. Бу тырааныспар өҥөтүгэр эмиэ сыһыаннаах. Түмүгэр бородууксуйабыт туох да күрэстэһиини сатаан тулуйбат. Онон, цифровой экономикаҕа көстөхпүтүнэ биирдэ аан дойду үрдүнэн атыыланар бородууксуйаны оҥорон таһаарыахпыт. Ону ырыынакка бэрт ситиһиилээхтик үлэлии сылдьар «My Tona» уонна «Синет» IT-хампаанньалар кэрэһэлииллэр.
Иккиһинэн, дистанционнай үөрэхтээһиҥҥэ уонна доруобуйа харыстабылыгар цифровой экономика көдьүүһэ улахан буолуо этэ. Өрөспүүбүлүкэ олохтоохторо номнуо билигин телемедицина өҥөтүнэн туһаналлар», — диэн эттэ Айсен Николаев.
Кини судаарыстыбаннай уонна муниципальнай өҥөнү бүтүннүү электроннай көрүҥҥэ көһөрдөххө, хоруупсуйа куттала аччыа, холобур, сири түҥэтии бэрээдэгэ аһаҕастык көстөн туруо этэ диэн бэлиэтиир.
Марианна Тыртыкова, «Саха сирэ», edersaas.ru