Абу-Даби куоракка (Холбоһуктаах Арабскай Эмираттар) ыытыллыбыт WorldSkills Competition 2017 с. профессиональнай маастарыстыба 44-с аан дойдутааҕы чөмпүйэнээтин “Кондитер дьыалата” компетенциятыгар ситиһиилээхтик кыттыбыт Санкт-Петербурдааҕы политехническэй университет устудьуона Степан Кириллиҥҥэ Ил Дархан бириэмийэтэ ананна.
edersaas.ru
Дьокуускайдааҕы потребительскай кооперация торговай-экономическай кэллиэһин бүтэрбит Степан Кириллин “Кондитер дьыалата” компетенция Арассыыйатааҕы кылаабынай эспиэрэ Елена Леленкова салалтатынан Индонезия, Кытай, Грузия, о.д.а. дойдулар 25 кыттааччыларын кытта күрэхтэстэ уонна профессиональнай маастарыстыбатын иһин медальон ылары ситистэ. Быйыл Арассыыйа Федерациятын сүүмэрдэммит хамаандата аан дойду чөмпүйэнээтигэр хамаанданан түмүккэ бастакы миэстэни ылла. Уопсайа 11 мэтээли уонна 21 профессиональнай маастарыстыбаларын иһин медальону ылары ситистилэр, итинтэн биирин Саха сириттэн сылдьар кондитер Степан Кириллин аҕалла.
Хаҥалас улууһуттан төрүттээх устудьуон былырыын WorldSkills араас түһүмэхтэригэр кыттыбыта итиэннэ бэйэтин профессионал быһыытынан көрдөрбүтэ. Ол курдук, олунньуга Дьокуускайга ыытыллыбыт эрэгийиэн чөмпүйэнээтигэр кыһыл көмүһү ылбыта, муус устарга Хабаровскайга финал аҥаарынааҕы күрэхтэһиини ааспыта, ыам ыйыгар Москва уобалаһыгар буолбут Национальнай чөмпүйэнээт финалыгар кыттар чиэстэммитэ. Оттон былырыын атырдьах ыйыгар Степан дойду сүүмэрдэммит хамаандатыгар киирэн, Кытайга тэриллибит норуоттар икки ардыларынааҕы чөмпүйэнээттэн үрүҥ көмүс мэтээллээх кэлбитэ.
Ил Дархан уонна СӨ Бырабыыталыстыбатын пресс-сулууспата.