Бүгүн – Комсомол күнэ! Аҕам саастаах дьоммут эдэр эрдэҕинээҕилэрин санаан үөрэллэр-көтөллөр, ол, биллэн турар, кинилэргэ эдэрдии-эрчими эбэр.
Буолан ааспыт историяны кэрэһэлиир үтүө бэлиэ күҥҥэ Үөһээ Бүлүү улууһун Нам нэһилиэгин олохтооҕо, 42 сыл устата суоппардаабыт Геннадий Гаврильев комсомол билиэттээх үөлээннээхтэригэр босхо уу баһарын туһунан аахсыйаны биллэрдэ. Төлөпүөнүгэр эрийэн билсибиппитигэр, «1976 сыллаахха Комсомол биир ньыгыл кэккэтигэр киирбитим. Бэрт да кэмнэр ааспыттар, билигин санаатахха. Ол иһин урукку кэмнэрбин санаан бу анал аахсыйаны биллэрдим. Биир ыалга ууну босхо куттум, комсомолларын билиэттэрин сыа-сым курдук тутан илдьэ сылдьаллар эбит.
Кэргэним эмиэ комсомолка бэрдэ этэ. Билигин иккиэн биэнсийэҕэ олоробут, түөрт оҕолоохпут, бары ыал дьон, биэс сиэннээхпит, күммүт-ыйбыт кинилэртэн тахсар. Билигин бу Бүлүү эбэ кытылыгар киирэн, уу оботторо сылдьабын. Түгэнинэн туһанан, Саха сирин ытык-мааны олохтоохторун барыгытын Комсомол күнүнэн эҕэрдэлиибин! Ураа!», — диэн санаатын үллэһиннэ уонна өссө кэргэнэ Людмила Михайловна суруйбут хоһоонун бэлэх уунар.
Комсомол күнүнэн!
Ил-эйэ эҥэрдээх
Ленинскэй комсомол
итии тыыныгар
иитиллибит
иһирэх майгылаах
истиҥ дьоммутугар
иһиллэнэ иэйэр
сылаас
тыыннаах эҕэрдэ!
Эдэр сааспыт
иэйиитин
эрчимнээхэй күннэрин эймэнитэ санатар
комсомолбут
аалай уоттаах
сулуһа сүрэхпит
умуллубат төлөнө
буолбута.
Кырдьар сааһы
кынаттыыр
Эмньик сааһы
санатар кыһыл
былаахпыт кытыастар.