Коми эксээмэҥҥэ 100 баалы ылбыттары уонна олимпиадаҕа кыайбыттары харчынан бириэмийэлиир
Коми Өрөспүүбүлүкэтэ биир кэлим эксээмэни 100 баалга туттарбыттарга уонна Бүтүн Арассыыйатааҕы олимпиада түмүктүүр түһүмэҕэр миэстэлэспиттэргэ харчынан бириэмийэ олохтообут.
Ити туһунан Коми Өрөспүүбүлүкэтин баһылыгын эбээһинэһин толорооччу Владимир Уйба брифинг кэмигэр иһитиннэрдэ. “Быйылгы сылтан өрөспүүбүлүкэҕэ биир кэлим эксээмэни 100 баалга туттарбыт 11-с кылаас үөрэнээччилэрэ, ону тэҥэ Бүтүн Арассыыйатааҕы үөрэнээччилэр олимпиадаларын түмүктүүр түһүмэҕэр миэстэлэспиттэр, кыайбыттар бириэмийэлэниэхтэрэ. Эрэгийиэҥҥэ маннык нуорма аан маҥнайгытын киирэр. Бүтүн Арассыыйатааҕы үөрэнээччилэр олимпиадаларын кыайыылаахтара 50 тыһ. солкуобайы, миэстэлэспиттэр – 30 тыһ. солкуобайы, онтон биир кэлим эксээмэҥҥэ муҥутуур үрдүк баалы ылбыт оскуоланы бүтэрээччи хас 100 баал аайы 50-нуу тыһыынча солкуобайы ылыаҕа. Бу биир кэлим эксээмэҥҥэ бэлэмнэнэргэ, үчүгэй түмүгү көрдөрөргө өссө биир көҕүлээһин”, — диэн салайааччы эттэ.
Итиэннэ бастакы харчынан бириэмийэни тутар оҕолор ааттарын — олимпиада быйылгы түөрт кыайыылааҕын аттаталаата.
Людмила ПОПОВА, “Саха сирэ” хаһыат, edersaas.ru