Муус устар 3 күнүгэр күнүс 4 чааска “Орто дойду” зоопаркаҕа Колымана диэн үрүҥ эһэ иккис оҕотун аан бастаан таһырдьа таһаарда. Бу үөрүүлээх түгэни үлэһиттэр «Инстаграм» ситиминэн быһа эпииргэ таһаардылар.
Эһэ оҕото атыыр эбит, сэтинньи ыйга күн сирин көрбүт. Төрүүрүгэр ыйааһына киилэ аҥаарын эрэ саҕа буоллаҕына, билигин 18 киилэҕэ чугаһаабыт. Эдьиийэ Хаарчаананы кытта тэҥнээн көрдөххө, бу кырачаан ордук мэник, сылбырҕа, билэр-көрөр баҕата улахан.
Хаарчаана аан бастаан таһырдьа тахсарыгар 12 киилэлээҕэ, кыыс-кыыс курдук нарын-намчы, холку уонна наҕыл этэ. Ийэтэ бастакы оҕотун олус үчүгэйдик бүөбэйдээбитэ, көрө-истэ сылдьыбыта. Оттон бу оҕотугар эрэнэрэ көстөр, төһө да сүүрдүн-көттүн, сыыртан сырылаатын, улаханнык долгуйбат.
Колымана – Муустаах муора кытылыттан булуллубут эһэ, онон дьиҥ айылҕа оҕото. Оҕотун көрөрө-харайара, бүөбэйдиирэ эмиэ айылҕатын ыйыытынан. Үрүҥ эһэ оҕото айылҕаҕа, туундараҕа бэйэтэ булан-талан аһыыра, тыыннаах буолара ыарахаттардаах, ол иһин үс сааһыгар диэри ийэтин кытта сылдьар. Оттон зоопаркаҕа төрөөбүт, улааппыт үрүҥ эһэлэр ийэлии инстиннэрэ арыый да мөлтөх соҕус буолар эбит.
Колымана түөрт ыйтан ордук кэмҥэ дьиэҕэ сытан баран, дьэ, муус устардааҕы чаҕыл күҥҥэ, сибиэһэй салгыҥҥа тахсан, хаарга күөлэһийэн ылбахтаата, күҥҥэ сыламнаан сыта түстэ. Зоопарк үлэһиттэрэ бэлэмнээбит тоҥ балыктарын кирэр кэмигэр, уола иннигэр-кэннигэр сүүрбэхтээтэ, балыгынан оонньоото. Алҕас үктэнэн сыыртан таҥнары сурулаан түһэн баран, сөбүлээн, хаста да сырылыы оонньоото. Билигин кини ийэтин үүтүнэн эрэ аһылыктанар, ол эрээри үтүктэн, балыгы да кирэн көрөрүн сирбэт. Үрүҥ эһэ үүтэ олус хойуу, сыалаах, иҥэмтиэлээх.
Сотору кэминэн эһэ оҕотугар аат толкуйдуурга күрэс биллэриэхтэрэ. Мана өрөспүүбүлүкэ бүттүүнэ кыттыһыаҕа. Хаарчаана аатын эмиэ күрэс биллэрэн, элбэх ааттан талан ылбыттара.
“Зоопарк усулуобуйатыгар үрүҥ эһэлэр төрөөн-үөскээн, ооҕлорун улаатыннараллара сэдэх көстүү. “Орто дойдуга” бу үгэс өссө да салҕаныа диэн эрэнэбин”, — диэн экология миниистирэ Сахамин Афанасьев бу үөрүүлээх түгэҥҥэ бэлиэтээтэ.
Ангелина Васильева, “Саха сирэ” хаһыат, edersaas.ru
Хаартыска: СӨ Экологияҕа, айылҕа харыстабылыгар, ойуур хаһаайыстыбатыгар министиэристибэтэ.