Колымана уонна Алмаас — аан дойдутааҕы сурунаалларга

Бөлөххө киир:

Фудблогер Наталья Оконешникова үрүҥ эһэлэри түһэрбит хаартыската, этэргэ дылы, сири-сибиири тилийэ көттө. Кэнники кэмҥэ аан дойдутааҕы пабликтар кини хаартыскатын таһаардылар.

Наталья “Орто дойду” зоопаркаҕа дьиэ кэргэнинээн сынньана сылдьан, Колымана уонна Алмаас оонньуу, хаарга күөлэһийэ сылдьалларын хаартыскаҕа түһэрбитэ. Кыыллар хаартыскаҕа түһэллэрин билбит курдук, дьоҥҥо чугаһаан кэлэн, араастаан күөлэһийэн, куустуһан, мэниктээн ылбыттара.

Саха сирин олохтоохторо бары бу хаартыскалары сэргээн, манньыйа көрбүттэрэ. Кэнники күннэргэ үрүҥ эһэлэр хаартыскаларын, кинилэр тустарынан информацияны мөлүйүөнүнэн сурутааччылаах NationalGeographic Russia сурунаал уонна The Sibеrian Times таһаардылар.

Наталья Оконешникова бу күннэргэ саха аһын туһунан кинигэ бэлэмнии сылдьар. Талааннаах фотограф үлэлэрин дойду бары муннуктарыттан, омук дойдуларыттан элбэх сурутааччылара олус биһирииллэр. Онон саха аһын тарҕатыыга, аан дойдуга таһаарыыга, туризмы сайыннарыыга Наталья улахан кылаатын киллэриэ диэн эрэнэбит.

Ангелина Васильева, “Саха сирэ” хаһыат, edersaas.ru
Хаартыска: СИА.

+1
0
+1
0
+1
0
+1
0
+1
0
+1
0
+1
0