СӨ бастакы вице-премьера Алексей Колодезников ВКС режиминэн ойуур баһаардарын туһунан суһал ыстаап мунньаҕын ыытта. Бүгүҥҥү күҥҥэ баһаарга уопсайа 244 киһи уонна 58 тиэхиньикэ үлэлиир. Ааспыт сууккаҕа Саха сирин территориятыгар 11 баһаар бохсуллубута.
Айылҕа харыстабылын миниистирэ Сахамин Афанасьев Таатта, Чурапчы улуустарыгар үлэлии сылдьар. Кини иһитиннэрбитинэн, балаҕан ыйын 22 күнүгэр Чурапчы улууһугар икки ойуур баһаара бохсуллубут. Ордук уустук балаһыанньа Амма өрүс уҥуор баар оттуур сирдэргэ буолбут, уот кэбиһиилээх окко кутталы үөскэппит. Маны быыһыырга миэрэлэр ылыллыбыттар.
«Балаһыанньа хонтуруолланар. Таатта Кыйытыгар буола турар баһаар бохсуллубута», — диир миниистир.
Алексей Колодезников эрэгийиэннээҕи ЫБММ-ҥа уоту хонтуруоллуур уонна кэтиир үлэни күүһүрдэллэригэр сорудахтаата. Итиэннэ Айылҕа харыстабылын министиэристибэтэ кыһалҕалаах улуустарга көмөлөһөрүгэр эттэ.
«Билигин бара турар баһаардар барыта дьон сэрэҕэ суох быһыытыттан таҕыстылар. Уот бастаан 4-5 гектар эбит буоллаҕына, билигин 25-40 гектардаах сиринэн тайаан сытар. Өртөөһүн саас ыытыллыахтаах, билигин буолбатах. Нэһилиэнньэҕэ маны өйдөтөр үлэни күүһүрдүөххэ», — диэтэ вице-премьер.
Маны сэргэ Алексей Колодезников Сахамин Афанасьевка ото умайбыт дьоҥҥо хоромньуну төннөрөргө этиилэри киллэрэригэр эттэ.
edersaas.ru