Сүрүн Уопсастыба

«Колмар» олохтоох дьону үлэлэтэргэ интэриэстээх

«Колмар» хампаанньаҕа үлэһиттэрин үөрэттэрэргэ, квалификацияларын үрдэтэргэ туһуламмыт кэккэ бырагыраамалар үлэлииллэр. Тоҕо диэтэххэ, бырамыысыланнас, оҥорон таһаарыы эбийиэктэрин үрдүк хаачыстыбалаах каадырдарынан хааччыйыы – судаарыстыба уонна биисинэс биир сүрүн соруктара буолар.

Ол курдук, “Колмарга” “Навахту14.рф” бырайыак иккис бөлөҕө баран үлэлээбитэ ыйтан орто. Бу бөлөххө Саха сирин олохтоохторо баран үлэлииллэр. Кинилэр хайдах үлэлии сылдьалларын, олохсуйбуттарын кэпсээтилэр.

— Мин Үөһээ Бүлүүттэн кэлбитим. Бу бырайыак чэрчитинэн сир анныгар үлэлиир горнорабочай идэтин баһылаан, үөрэнэн, “Колмарга” үлэлии сылдьабын. Үлэм интэриэһинэй, кэлэктииппит иллээх. Онон Нерюнгригэ хаалан олохсуйар, үлэлиир-хамсыыр санаалаахпын, — диэн Айхал Анисимов кэпсиир.

— Биир ый биллибэккэ ааста. Кэлэктиипкэ бэркэ көрсүбүттэрэ, туох да куһаҕан сыһыан суох этэ. Урут атын хампаанньа рудниктарыгар үлэлээбитим, онно тоҕо эрэ кыһалҕаттан үлэлиир курдугум. Манна үлэбэр үөрэ-көтө барабын, үлэм интэриһиэнэй. Бу бырайыакка доҕорум сүбэтинэн кэлбитим. Билиҥҥитэ икки сыл хаалан үлэлиир былааннаахпын, онтон көстөн иһиэҕэ, — диэн Сунтаартан төрүттээх Константин Егоров этэр.

Колмарга” эдэр исписэлиистэр элбэхтэр. Кинилэри үөрэтэргэ, кыахтарын арыйарга болҕомто ууруллар. Хампаанньа салайааччылара кэлэктиип иллээх буоларыгар, бэйэ-бэйэҕэ көмөлөсүһүү, сайдыы эйгэтэ баар буоларыгар кыһаллаллар.

— Бу эдэр исписэлиистэр көхтөөхтөр, барыны бары билэ-көрө сатыыллар. Идэлэрин сөбүлүүллэрэ көстөр. Билигин учаастакка сүрүннээн күүс үлэтигэр сылдьаллар, онтон идэлэрин толору билэллэрин, баһылыылларын туһугар маркшейдердар салалталарынан баран үлэлиэхтэрэ, — диэн “Инаглинскай” шахта конвейернай тырааныспар уонна монтажнай үлэ учаастагын начаалынньыга Юрий Быченко бэлиэтиир.

— Өрөспүүбүлүкэ салалтата уонна “Колмар” сөбүлэһиилэринэн, олохтоохтору үлэлэтии бырагыраамата түргэнник олоххо киирдэ. Баҕалаах дьону аҕытаассыйалаан, үөрэтэн, докумуоннарын толорон, медосмотрга көрдөрөн, тэрилтэҕэ тиийэллэрин хааччыйан – бу үлэ олус түргэнник ыытылынна. Бэс ыйыгар өссө 2 бөлөҕү бэлэмниир былааннаахпыт. Идэ испииһэгин кэҥэтиэхпит, бары улуустартан дьону үлэҕэ ылыахпыт, — диэн “Навахту14” бырайыак көҕүлээччитэ, “ПРОконсолидация-Якутия” бырайыактыыр офис салайааччыта Петр Чехордун кэпсээтэ.

Оттон бырамыысыланнас, геология миниистирэ Максим Терещенко “Колмар” хампаанньаны кытары бииргэ үлэлэһиини салгыыр туһунан этэр. Түргэнник үөрэнэн бүтэрэр куурустары, идэни уларытыыны, онтон да атын бырагыраамалары, ол иһигэр чох хостооһунугар үөрэтэр кластеры киллэриэхтэрэ. “Колмар” дьарыктаах буолуу кииннэрин, олохтоох дьаһалталары, “Навахту14.рф” бырайыагы, Соҕуруу Саха сиринээҕи технологическай кэллиэһи кытары бииргэ үлэлэһэр диэн хампаанньа пресс-сулууспата иһитиннэрэр.

Ангелина Васильева, “Саха сирэ” хаһыат, edersaas.ru

Хаартыска: sakha.gov.ru

0
0