«Колмар» 1600 олохтоох каадыры үлэлэттэ

Бөлөххө киир:

Ааспыт сылга “Колмар” хампаанньа өрөспүүбүлүкэҕэ 1600 киһини үлэҕэ ылан, үлэлэттэ. Бу дьонтон тыһыынча кэриҥэ киһи 35-гэр диэри саастаах эдэр дьон, аҥаардара улуустартан кэлэн, үлэ булбуттар. Бу — 2021 сылга бырамыысыланнай хампаанньаларга бастыҥ көрдөрүү.

— “Колмар” хампаанньа олохтоох каадырдары бэлэмнээһиҥҥэ уонна үлэлэтиигэ кылгас кэм иһигэр холобур буолла. Хампаанньа үлэһиттэрэ уонна “Навахту14” бырайыак аҕыйах ый иһигэр олохтоох дьону үлэҕэ ылыыны 20 төгүл элбэппиттэрэ элбэҕи этэр. Резюмены эрэ көрбөккө, үлэҕэ киирии бары боппуруостарыгар – аҕытаассыйаттан саҕалаан, миэдиктэргэ көрдөрүүгэ, үлэлиир сиргэ диэри тиэрдиигэ, докумуоннары бэлэмнээһиҥҥэ тиийэ көмөлөстүлэр. “Колмар” курдук хампаанньалар элбииллэригэр эрэнэбит, — диэн Ил Дархан Айсен Николаев бэлиэтээтэ.

Навахту14.рф”бырайыак бырабыыталыстыба, тустаах министиэристибэлэр уонна Дьарыктаах буолуу кэмитиэтин өйөбүллэрин тэриллибитэ. Өрөспүүбүлүкэҕэ “Олохтоох каадырдары – бырамыысыланнаска” бырагыраама сэргэ үлэлиир.

Колмардар” ааспыт сылга сүрүннээн “Инаглинскай” шахтаҕа үлэһиттэри ылбыттар. Бу сылтан “Илиҥҥи Денисовскай” шахтаҕа ылар былааннаахтар. Үчүгэйэ диэн, саҥа үлэһиттэр үөрэнэ охсоллоругар, олохсуйалларыгар көмөлөһөллөр: настаабынньык аныыллар, олорор сир биэрэллэр, үөрэттэрэллэр, квалификациятын үрдэтэллэр.

Оттон “Навахту14.рф” бырайыак быйыл да “Демография” федеральнай бырайыак чэрчитинэн дьону босхо үөрэттэрэрин, үлэ буларын салгыыр. Ону тэҥэ исписэлиистэр испииһэктэрэ кэҥмэҕэ.

Бырамыысыланнаска үлэлиэн баҕалаахтар босхо үөрэнэллэригэр, үлэ булалларыгар навахту14.рф саайтка киирэн, эбэтэр, +7(968) 154-05-08, +7(914) 829-81-98 төлөпүөннэргэ эрийэн, билсиэххитин сөп.

Ангелина Васильева, “Саха сирэ” хаһыат, edersaas.ru

Хаартыска: ykt.ru

+1
0
+1
0
+1
0
+1
0
+1
0
+1
0
+1
0