РФ бырабыыталыстыбата Арассыыйаҕа «Омикрон» штамм тарҕаныытын бохсорго уонна ковидтан эмсэҕэлээбит ыарыһахтарга көмөлөһөргө доруобуйа харыстабылын систиэмэтин бэлэмнииргэ эбии дьаһаллар былааннарын олоххо киллэриини саҕалаата.
Эрэгийиэннэр салайааччылара бырабыыталыстыба бэрэссэдээтэлэ Михаил Мишустин сорудаҕынан былаан толоруллуутун хааччыйыахтаахтар уонна бу үлэни тус хонтуруолларыгар ылыахтаахтар.
Михаил Мишустин сорудахтарыгар ыарыһахтарга оҥоһуллар мэдиссиинискэй көмө эмиэ киирдэ. Холобур, эрэгийиэннээҕи колл-кииннэр 2020 сылтан үлэлээбиттэрэ. Маннык кииннэр эпэрээтэрдэрэ нэһилиэнньэ ыйытыыларыгар хоруйдаан, поликлиникалар регистратураларын ноҕуруускаларын кыччатарга көмөлөһөллөр. Ол да иһин, бырабыыталыстыба бэрэссэдээтэлэ колл-кииннэр сөптөөх ахсааннаах исписэлиистэринэн хааччыллыыларыгар ураты болҕомтону уурарга сорудахтаата. Төлөпүөнүнэн эрийиилэр, ыҥырыылар киирэллэрэ элбэҕин учуоттаан, мэдиссиинискэй үрдүк үөрэх кыһаларын уонна кэллиэстэр устудьуоннарын бу үлэҕэ кытыннарыы былааннанар.
Кинилэр үлэлэрин төлүүргэ ый аайы 300 мөлүйүөнтэн итэҕэһэ суох суумалаах үп көрүллүөҕэ.
Надежда ЕГОРОВА, «Саха сирэ», edersaas.ru