Доруобуйа харыстабылын бастакы сүһүөх звенотугар бу күннэргэ өрөспүүбүлүкэ араас мэдиссиинискэй тэрилтэлэрэ көмөлөһөллөр.
edersaas.ru
Ол иһигэр, М.К.Аммосов аатынан Мэдиссиинэ институтун бэрэпиэссэрдэрэ, преподавателлэрэ колл-кииннэргэ үлэлэһэллэр.
Мэдиссиинискэй наука доктора, бэрэпиэссэр, акушерство уонна гинекология хаапыдыратын сэбиэдиссэйэ, үлэлии сылдьар акушер-гинеколог Роза Филиппова СӨ Доруобуйа харыстабылын министиэристибэтин ыҥырыытын үөрэ-көтө ылыммытын туһунан этэр.
— Бу күннэргэ биир идэлээхтэрбит үлэлэрэ олус элбээн, кинилэргэ көмөлөспөккө хааларбыт сатаммат. Араас мэдиссиинэ тэрилтэлэригэр үрдүкү куурустар уонна килиниичэскэй ординатуралар устудьуоннара, аспираннар, магистраннар көмөҕө кэлэн үлэлии сылдьаллар. Онтон колл-кииннэргэ сүбэлиир быраастар наада буолбуттарыгар биһиги үгүс преподавателлэрбит, ол иһигэр педиатр, инфекционист, дерматолог, пульмонолог быраастар, толкуйдуу, саарыы да барбакка, бэнидиэнньиктэн тута ылсыспыттара, -– диэн Роза Дмитриевна нэһилиэнньэҕэ наадалаах, туһалаах дьон буола сылдьалларыттан үөрэрин туһунан этэр.
Кини этэринэн, консультант-быраастар соруктарынан ыарыһахтарга дьуһуурунай быраас кэлиэр диэри наадалаах иһитиннэриилэри оҥоруу, сүбэ-ама биэрии буолар.
«Кыраадыстара аһара тахсыбыт ыарыһахтар ардыгар олус уолуйаллар, ыарыыга бэринэргэ бэлэм буолан хаалаллар. Бу бириэмэҕэ кинилэргэ сөптөөх сүбэни-аманы биэрэр, уоскутар улахан суолталаах. Онон, уопуттаах мэдиссиинискэй үлэһиттэр сүбэһитинэн кэлбиттэрэ -– сөптөөх быһаарыы. Кол-кииннэри тэрийиини сөптөөҕүнэн сыаналыыбын.
Холобур, билигин элбэх оҕо ыалдьар, эдэр ийэлэр эмиэ олус ыксыыллар. Маныаха уопуттаах педиатр сүбэтэ туохтааҕар да наада. Маннык сүбэҕэ-амаҕа ковидтаабыт, оҕо күүтэр дьахталлар эмиэ наадыйаллар. Кинилэр оҕо күүтэр кэмнэригэр организмнара, ыарыыны утары охсуһар күүстэрэ мөлтүүрүнэн, инфекцияҕа кэбэҕэстик сысталлар. Гинеколог-быраас быһыытынан, бэйэлэрин харыстаналларыгар, дьиэҕэ олороллоругар сүбэлиэм этэ. Санатан эттэхпинэ, билигин гинеколог уонна терапевт көҥүллээтэҕинэ, Спутник –V быһыыны төрөөн баран, оҕону эмтэрэр кэм саҕана ылар көҥүллэннэ. Бу ыарыыттан харыстаныы ньымата, ол эрээри, быһыыны ылар туһунан хат буолуох иннинэ толкуйдуур ордук», -– диэн Роза Филиппова кэпсээтэ.
Надежда ЕГОРОВА, «Саха сирэ» хаһыат, edersaas.ru
Хаартыска: СӨ Доруобуйа харыстабылын министиэристибэтин саайтыттан