Эрдэ иһитиннэриллибитин курдук, СӨ Доруобуйа харыстабылын министиэристибэтэ бэйэтин суһал ыстаабын тэрийбитэ.
Ол эбэтэр, коронавируһу кытта сибээстээх боппуруостарынан эрийиэххэ сөптөөх «122» суһал линия көдьүүстээҕэ уонна атын исписэлиистэр ноҕуруускаларын биллэ аҕыйатара билиннэ.
Диспетчэрдэр сууккаҕа ортотунан уон тыһыынча курдук ыҥырыыны туталлар. Доруобуйа харыстабылын колл-киинин салайааччыта Аида Коростылева эппитинэн, ордук элбэхтик сарсыарда эрийэллэр, ол иһин, сарсыардааҥҥы уонна уонна күнүскү симиэнэҕэ 50-нуу киһи үлэлиир. Онтон түүҥҥү кэмҥэ өссө 30 киһи эбиллэр. Ол эбэтэр сууккаҕа 130 диспетчер уонча тыһыынча ыҥырыыга хоруйдуур.
Ону таһынан суһал линия диспетчердара Дьокуускай куорат түөрт поликлиникатын колл-кииннэрин кытары бииргэ үлэлииллэр.
Холобур, эн «122» эрийэн поликлиниканы кытта холбуурга көрдөһүөххүн сөп, оччоҕо ыҥырыыҥ мэдиссиинискэй тэрилтэ колл-киинигэр бэриллэр.
«Онон, биһиги уонна поликлиника диспетчердэрин холбоон, сибээскэ 105 киһи олорор. Кэнники кэмнэргэ олус элбэх ыҥырыы киирэр. Биһиги диспетчердэрбит суукканы быһа үлэлииллэр, эбиэттии барбаттар, симиэнэ уларыйыытыгар эрэ сынньаналлар. Сибээскэ эппиэти күүтүү бириэмэтэ ортотунан 60 сөкүүндэ курдук. Ол гынан баран, холобур, бэнидиэнньик сарсыарда диспетчер хардата 6 мүнүүтэҕэ диэри уһуон сөп», -– диэтэ колл-киин салайааччыта.
Надежда ЕГОРОВА, «Саха сирэ», edersaas.ru