Москватааҕы Тверской суут футболистары, Александр Кокорины уонна Павел Мамаевы, ахсынньы 8 күнүгэр диэри хаайда. Кинилэри кытта Александр Кокорин быраата Кирилл эмиэ хаайылынна.
Футболистары хаайар туһунан силиэстийэни ыытааччылар хадатаайыстыбаларын борокуруор бигэргэппит. Дьыаланы икки судьуйа көрбүт, үөрэппит. Силиэдэбэтэл Кокорины дьоҥҥо кутталлаах киһи диэн биллэрбит. Босхолоотоххо, куотан хаалыан сөп диэн сэрэхэчийбит. Кинини дьону улаханнык эчэтиигэ уорбалыыллар.
Кокорин адвоката куораттан ханна да барбат усулуобуйалаах босхолото сатаабыт. Кокорины бэрээдэктээх спортсмен уонна аҕатын үчүгэй эрэллээх уола диэбит.
Александр суукка кырбаабыт дьонуттан бырастыы гыналларыгар итиэннэ хаайтарбаттарыгар көрдөспүт. Бырастыы гыннарар туһугар тугу баҕараргытын гыныам диэбит. Мамаев эмиэ бырастыы гыналларыгар көрдөспүт уонна полицияттан куотуом суоҕа диэн эрэннэрбит.
Санатан эттэххэ, алтынньы 8 күнүгэр, Александр Кокорин быраатын Кирилы уонна доҕорун Павел Мамаевы кытта «1 ханаал» ыытааччыта Ольга Ушакова суоппарын кырбаабыттар. Аҕыйах чаас буолан баран, кафеҕа Минпромторг департаменын салайааччытын Денис Пагы уонна ФГУП «НАМИ» генеральнай дириэктэрин Сергей Гайсины эчэппиттэр. Денис Пак төбөтүгэр улахан эчэйиини ылбыт.
Күлүгээттэргэ холуобунай дьыала тэриллибит. Александр Кокорин «Зенит» футбол кулуубугар оонньуур. Павел Мамаев оонньуур «Краснодар» кулуубуттан үүрүллэр кутталлаах.
Николай ПОПОВ, «Саха сирэ» хаһыат, edersaas.ru