Андрей Кобяков: «Дьокуускайга диэри биэс чаас айанныыр буоллубут»
Бу нэдиэлэ бүтүүтэ, алтынньы 23 күнүгэр, Кэбээйи нэһилиэгин олохтоохторо өр күүппүт айан суола арыллыаҕа. Суол оҥорооччулар бу күннэргэ 25 килэмиэтирэттэн тахса уһуннаах суолу, Түгэнэ үрэҕи туоруур 106 миэтэрэлээх муостаны оҥорон түмүктээтилэр.
Кэбээйи нэһилиэгин баһылыгын Андрей Николаевич Кобякову кытта улахан суолталаах айан суолун туһунан кэпсэттибит:
— Дьокуускайга диэри айан суолун боппуруоһа биһиэхэ 90-с сыллартан турар. Суолламмыппыт, муосталаммыппыт 27 сыллаах улахан үлэ түмүгүнэн буолар. Биһиги нэһилиэкпитигэр эрэ буолбакка, бүтүн улууска улахан суолталаах суол алтынньы 23 күнүгэр арыллыаҕа. Айан суола Кэбээйи улууһун хаһаайыстыбатыгар, социальнай-экэнэмиэчэскэй сайдыытыгар үтүө уларыйыылары аҕалыаҕа диэн эрэнэбин.
Бу суол оҥоһулларыгар биир дойдулаахпыт Михил Ильич Эверствов, өрөспүүбүлүкэ судаарыстыбаннай сүбэһитэ Вячеслав Анатольевич Штыров, Ил Дархаммыт Айсен Сергеевич Николаев улахан өҥөлөөхтөр. Суолу кытта Түгэнэ үрэҕи туоруур 106 миэтирэ усталаах муоста оҥоһулунна. Муоста биһиги нэһилиэкпититтэн 55 килэмиэтирэ тэйиччи турар. Билигин суол бэлиэлэрин, хааччахтары туруора сылдьаллар, улахан үлэтэ түмүктэммитэ.
Мин Кэбээйи нэһилиэгэр төрөөбүтүм, улааппытым уонна баһылыктаабытым үс сыл буолла. Онон төрөөбүт дойдум кыһалҕаларын барытын билэ-көрө улааппытым. Саҥа суолбутунан айаннаабытым. Урукку өттүгэр Дьокуускайга диэри олохтоохтор бэрт эрэйинэн, ардыгар икки-үс күн хонон айанныыр этибит. Билигин биэс чааһынан айаммыт муҥурданар буолбутуттан олуһун үөрэ, астына сылдьабыт. Аны айан төлөбүрэ икки тыһыынча солкуобайга тэҥнэстэ, урут түөрт-биэс тыһыынча солкуобай буолара.
Кэбээйи нэһилиэгэр 2700 киһи олорор. Мантан инньэ ыарыһахтар баралларыгар-кэлэллэригэр эрэйдэммэттэр, урбаанньыттар ас-үөл, таһаҕас тиэйиитигэр абыраналлар. Отучча маҕаһыыннаахпыт. Бэйэ дьыалатын тэриниэн, дьарыктаныан баҕалаах дьоҥҥо өссө кыах баар буолла.
Кэлэр сылларга биһиэхэ 140 миэстэлээх уһуйаан уонна хаарбах туруктаах дьиэттэн көһөр дьоҥҥо анаан элбэх кыбартыыралаах дьиэ тутуллаллара былааннанар. Тутуу матырыйаала кэлиитигэр, таһыыга-тиэйиигэ кыһалҕалары аны көрсүбэпппит диэн үөрэбит.
Бу суолунан биһигиттэн ураты Арҕас, Чагда уонна Тыайа нэһилиэктэрэ айанныыллар. Аны Хатыҥ-Үрэх учаастагын суола оҥоһулуннар диэн саныыбыт, бырайыага толкуйдана сылдьар.
Улахан суолталаах айан суола арыллыбытынан Ил Дархаммытыгар Айсен Николаевка, Ил Түмэн дьокутаатыгар Михаил Эверстовка, улууспут баһылыгар Иван Левиҥҥа, бэдээтчиттээбит «Дороги Саха» тэрилтэҕэ, дириэктэригэр Валерий Малышевка, Саха сирин автомобильнай суолларын управлениетын салайааччытыгар Семен Филипповка, «Кобяйдорстрой» салайааччытыгар, суолга үлэ саҕаланыаҕыттан иилээбит-саҕалаабыт, тиһэҕэр диэри тиэрдибит киһибитигэр Николай Степанович Кобяковка улахан махталбытын тиэрдэбит.
Айтана Аммосова, edersaas.ru