Дьокуускайга «Квартал труда» креативнай кластер резиденэ өрөспүүбүлүкэ улуустарыгар аныгы киинэ саалаларын тэрийии бырайыагын сайыннарары, итинтэн сиэттэрэн атын эрэгийиэннэргэ сонун сүүрээни киэҥник тарҕатары былаанныыр.
Бу туһунан «Өрөспүүбүлүкэтээҕи киинэ ситимин» дириэктэрэ, «MAGDIS» устуудьуйа продюсера Петр Чиряев РФ бырабыыталыстыбатын вице-премьерэ — РФ бэрэсидьиэнигэр Уһук Илин федеральнай уокурук боломуочуйалаах бэрэстэбиитэлэ Юрий Трутневка сырдатта.
«Арассыыйаҕа 150-тан тахса нэһилиэнньэлээх пууҥҥа баара-суоҕа 2150 киинэ тыйаатыра баар. Буолан баран, итинтэн улахан аҥаара дойду киин куораттарыгар. Оттон дьон-сэргэ 30 %-ра, ол эбэтэр, 44 мөл. киһи киинэ тыйаатыра суох сиргэ олорор. Сэлиэнньэлэргэ киинэ суох, көрдөрүллүбэт. Биһиги ити кыһалҕаны быһаарыахпытын баҕарабыт«, — диир Пётр Чиряев.
Бу сыалы толорорго EIKI диэн Япония хампаанньатын кытары EIKI EK-357U диэн ураты проектор оҥоһуллубут уонна ExtraCinema цифровой платформа тэриллибит.
«Бу систиэмэҕэ сыыппараламмыт контент киирэр, ону куопуйалаан ылар кыахтара суох. Итиннэ барытын кэтээн көрөллөр. Ол эбэтэр, бас билээччи бырааптаах эрэ контенын үллэстэр. Проектор туруоруллубут тыа сирин кулууба платформаттан көмүскэллээх уонна туйгун хаачыстыбалаах киинэни хачайдаан ылыан, дьоҥҥо көрдөрүөн сөп уонна болдьохтоох кэмэ туолла да контент сотуллар«, — диэн быһаарар Пётр Чиряев.
Бырайыак бастаан Саха сиригэр саҕаланыа онтон салгыы Арассыыйа атын эрэгийиэннэригэр тарҕаныа.
«MAGDIS» киинэ устуудьуйата «Рядовой Чээрин» киинэнэн киэҥ аудиторияҕа биллибитэ. Киинэни оҥорооччулар бэлиэтииллэринэн, аан бастаан саха киинэтигэр графика уонна спецэффектэр хото туһаныллыбыттар. Онон аныгы тэриллээх креативнай кластер олохтоох киинэни атын таһымҥа уонна атыы саҥа ырыынагар таһаарарга көмөлөһүөҕэ диэн бэлиэтииллэр.
Манна киинэни, анимацияны, компьютернай графиканы, муусуканы, сыыппаранан контены, архитектураны, дизайны уонна норуот уус-уран оҥоһуктарын биисинэһигэр бары наадалаах инфраструктура тэриллиэҕэ.
Санатан эттэххэ, СӨ Ил Дархана Айсен Николаев креативнай кластеры тэрийии туһунан быһаарыыны 2020 сыллаахха Ил Түмэҥҥэ Анал этиитигэр иһитиннэрэн турар.
+1
+1
+1
+1
+1
+1
+1