Сүөһү сайылыкка таҕыста, «улахан үүт» кэмэ саҕаланна.
Өрөспүүбүлүкэ үрдүнэн быйыл 74,5 тыһ. т үүт соҕотуопкаланыа, онуоха киилэ үүт 45 солк. тутуллуо (35 солк. субсидия, 10 солк. соҕотуопкалыыр тэрилтэ биэрэр). Үүт харчыта үрдээбитэ туох интэриэһи тардыбытын чопчу биир улуус, Нам, холобуругар ырылхайдык көрүөххэ сөп.
Edersaas ru.
«Эрэл» ТХПК кылаабынай технолога Александр Винокуров:
– Үүтү туттарыан баҕалаах элбээтэ: урукку өттүгэр үүт туттарбатах элбэх ыал биһигини кытары үлэлииргэ дуогабардаста. Оттон «Сэргэ», «Дьөһөгөй», «Бережнева», «Ымыйах» курдук бөдөҥ бааһынай хаһаайыстыбалар ыанньыктарын элбэттилэр. Онон, былырыыҥҥытааҕар 300 туоннанан элбэҕи, 3 тыһ. 774 т үүтү соҕотуопкалыырга былааннанныбыт.
Кэпэрэтиип базатын утумнаахтык хаҥатар. Ол курдук, ааспыт сылларга тутар пууннары саҥардыбыта, билигин сыахтарын сөргүтэр. Былырыын саҥа буойунаны үлэҕэ киллэрбитэ, быйыл оҕуруот аһын харайар ыскылааты оҥорор. Итинэн үүтү-эти таһынан, оҕуруот аһыгар уонна хортуоппуйга эмиэ үлэлиэ. Өрүс уҥуордааҕы нэһилиэктэр, Модут, Партизан сыахтара үүттэрин бэйэлэрэ астыыллар, онтон атыттар үүттэрэ Намнааҕы үүт собуотугар астанар. Собуокка үрүҥ ас уонча көрүҥэ оҥоһуллан, улуус иһигэр уонна куоракка «Сахаагропродукт» кэпэрэтиип иһинэн батарыллар. Бородууксуйатын батарар эйгэтин кэҥэтэр сыалтан, «Эрэл» быйыл куоракка икки сиргэ («Столичнай» ырыынак таһыгар уонна «Сайсары» ырыынакка) фирменнэй киоска арыйда.
Нам улууһун суола-ииһэ үчүгэй, нэһилиэктэр бэйэ-бэйэлэриттэн чугастар, хаһаайыстыбалар үүккэ интэриэстэрэ улаатан иһэр. Итини учуоттаан, кэпэрэтиип салалтата собуот кыамтатын улаатыннарарга үлэлэһэн, улуус баһылыга Александр Атласов өйөбүлүнэн, саҥа астыыр кэмбинээти тутар сирин быһаартарбыт.
Хаартыскаҕа: «Эрэл» собуота билигин күҥҥэ 3 туонна үүтү астыыр.
Хаҥастан уҥа: лабараан Александра Павлова, оператор Сардаана Аргунова, оробуочай Светлана Ефимова.
Раиса Сибирякова, “Саха сирэ” хаһыат, Edersaas ru.