«Мин үрүҥ түүннэрим» киинэ олунньу 8 күнүгэр сүрэхтэниэҕэ

Бөлөххө киир:

«DetSAT» айар холбоһук, «Сахафильм» киинэ хампаанньата уонна М.К.Аммосов аатынан Хотугулуу-Илиҥҥи федеральнай университет устудьуоннарын идэлээх сойууһа кыттыгас киинэ уһуллулар. Киинэ тапталлаахтар күннэрин көрсө быйыл олунньу 8 күнүгэр Саха сирин бары киинэ тыйаатырдарыгар сүрэхтэниэҕэ. edersaas.ru

Саҥа киинэни 2017 сыл сайыныгар Дьокуускай куоракка устубуттара. Киинэ устудьуоннар көрдөөх олохторун туһунан буолан, бастаан «Халява, ловись!», онтон «Моя чокнутая сестренка» диэн ааттана сылдьыбыта. Кэлин киинэ ааптардара «Мин үрүҥ түүннэрим» диэн ааты сөптөөх эбит диэн уларыттылар.

Саҥа киинэ туһунан ХИФУ устудьуоннарын идэлээх сойууһун бэрэссэдээтэлэ, Ил Түмэн дьокутаата Александр Сусоев кэпсиир:

— Киинэ жанра — романтическай комедия. Киинэ устар туһунан санаа бастаан миэхэ кэлбитэ. Онтон сыыйа-баайа устудьуоннарбын, «DetSAT» айар холбоһугу, «Сахафильм» киинэ хампаанньатын кытта кэпсэтэн, ааспыт сыл сайыныгар Дьокуускайга устубуппут. «Мин үрүҥ түүннэрим» киинэҕэ устудьуон олоҕун, таптал уонна эдэр саас туһунан көстүөҕэ. Сценарийы Алексей Амбросьев суруйбута уонна кини режиссердаата, Дмитрий Шадрин Степан Порядинныын продюсердаатылар. Сүрүн оруоллары ХИФУ устудьуоннара — Ализана Слепцова уонна Дьулусхан Андросов толордулар. Дьулусхан идэлээх сойуус КВН хамаандатын хапытаана буолар. Киинэ бүддьүөтүн үс тэрилтэ — «DetSAT» айар холбоһук, «Сахафильм» киинэ хампаанньата уонна ХИФУ устудьуоннарын идэлээх сойууһа уйунна. Сахалыы тылынан уһулунна, ол эрээри нууччалыы титрдаах буолуоҕа. Номнуо киинэбит бастакы барыйаанын көрбүппүт, олус табыллыбыт диэн үөрдүбүт. Манна киһини үөрдэр, толкуйдатар, харах ууланар даҕаны түгэннэр бааллар. Олунньу 8 күнүттэн Саха сирин бары киинэ тыйаатырдарыгар көрөөччүлэрбитин күүтэбит! 

Айтана Аммосова, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0