Саха барахсан былыр-былыргыттан остуоруйалаһар, үһүйээннэри уостан-уоска түһэрэн кэпсэтэр үгэстээх. Өбүгэ сиэринэн кистэлэҥнээх остуоруйалары, сэһэннэри кэпсэтиигэ П.А.Ойуунускай аатынан литература мусуойа ыҥырар.
Тохсунньу 16 күнүгэр 12 чаастан «Остуоруйа түһүлгэтэ» ыалдьыттары күүтэр. Ыраахтан-чугастан ааттаан-суоллаан анаан мустубут бар дьоҥҥо остуоруйаһыт, кэпсээнньит, «Кэскил» хаһыат сүрүн эрэдээктэрэ Евдокия Иринцеева-Огдо остуоруйалаан болҕомтону тардыаҕа. Сарсыныгар, тохсунньу 17 күнүгэр, 16 чаастан «Үһүйээн киэһэтигэр» «Арчы» дьиэтин дириэктэрэ, суруналыыс Валентина Бочонина, Литературнай музей үлэһитэ Егор Дохунаев күүтэллэр . Тохсунньу 21 күнүгэр 15 чаастан «Норуот остуоруйалара» дьону-сэргэни түһүлгэҕэ түмэ тардыаҕа. Остуоруйаһыт, олоҥхоһут, олоҥхо тыйаатырын артыыһа Валентин Исаков остуоруйалаан, истээччилэри сэргэхситиэ. Тохсунньу 22 күнүгэр 16 чаастан “Остуоруйаҕа – өбүгэ үгэһэ” саҕаланыа. Норуот эмчитэ, уйулҕа уһуйааччыта Юлия Николаева-Намылҕа сэргээччилэри, сэҥээрээччилэри кытары атах тэпсэн олорон ирэ-хоро сэһэргэһиэ, ыйытыыларга хоруйдуо, сүбэ-ама биэриэҕэ.
Күүтүүлээх, долгутуулаах тэрээһиннэргэ сылдьыан баҕалаахтары П.А. Ойуунускай аатынан литературнай мусуойга күүтэллэр. Сиһилии 428912 төлөпүөҥҥэ эрийэн билсиҥ.
Хаартыска: интэриниэттэн
+1
+1
+1
+1
+1
+1
+1