Суруйааччы Р.А.Кулаковскай төрөөбүтэ 105 сылыгар аналлаах литературнай викторина Таатта улууһугар ыытылынна.
Тэрийээччилэртэн биирдэстэрэ, Дьохсоҕон нэһилиэгин М.А.Петров аатынан бибилэтиэкэ сэбиэдиссэйэ Галина Другина дьон-сэргэ билиитин-көрүүтүн хаҥатар викториналары, куонкурустары тиһиктээхтик ыыталларын, сэргээн кыттааччы элбээн иһэрин бэлиэтээтэ.
— Биһиги үлэбитигэр сэргэх тэрээһиннэри, истиҥ көрсүһүүлэри, араас күрэстэри, куонкурустары, уопсайынан дьон болҕомтотун тардар үлэни ыытарга кыһаллабыт. Маннык ньыманан ааҕааччыларбытын бэйэбитигэр тардабыт уонна кэнчээри ыччаты угуйабыт. Ол курдук, улуу Өксөкүлээх удьуорун салҕааччы, уратылаах прозаик Реас Алексеевич Кулаковскай олоҕун-дьаһаҕын, үлэтин-хамнаһын, айымньыларын туһунан, уопсайа 20 ыйытыылаах викторинаҕа дьон-сэргэ кыһамньытын ууран кыттыбыта көһүннэ. Хоруйдар чугастааҕы улуустартан ордук хото киирдилэр. Ону сэргэ, викторинаны көтүппэккэ кыттар дьоммут хоруйдарын бастакынан ыыттылар. Итини таһынан, кэрэхсэбиллээҕэ, эдэр дьон сэргээн, сэҥээрэн маннык күрэстэргэ кыттара элбээн иһэрэ бу да сырыыга көһүннэ, бигэргэннэ. Викторина кыайыылаахтарыгар уонна кыттыыны ылбыт бары дьоҥҥо улахан махталбытын тиэрдэбит. Кэлэр да өттүгэр көхтөөх кыттыыны ылалларыгар баҕарабыт, — диэн эттэ.
Викторина түмүгүнэн бастакы үрдэли Вера Богдокумова (Таатта, Чычымах), иккис үрдэли Александра Грязнухина-Хойутаана (Таатта, Ытык Күөл), Марина Охотина (Таатта, Дьохсоҕон), үһүс үрдэли Семен Эверстов (Мэҥэ Хаҥалас, Майа) ылбыттар.