Бэс ыйын 22 күнүгэр СӨ Ил Дархана Айсен Николаев «Россия 24» ханаалга ГТРК «Саха» «Быһа кэпсэтии» биэриитигэр кытынна уонна олохтоохтор ыйытыыларыгар хоруйдаата.
Ил Дархан Украина балаһыанньатын уонна кинилэргэ хайдах көмөлөһүөххэ сөбүн туһунан ыйытыыга хоруйдаата.
Айсен Николаев бу туһунан элбэх киһи ыйыталаһарын уонна тус бэйэтигэр эмиэ суруйалларын туһунан эттэ.
“… Үгүстэр Украинаҕа чөлүгэр түһэрэр үлэлэргэ барыахтарын баҕараллар. Бастатан туран, Саха Өрөспүүбүлүкэтэ Донецкай уобалас Кировскай куоратын кытары шефтэһэр. Бу биһиги Мииринэйбит саҕа кээмэйдээх куорат. Манна урусхалланыы элбэх. Билигин биһиги инники сылдьар бөлөхтөрбүт итиннэ үлэлииллэр. Быйыл онно тугу үлэлиэхтээхпит номнуо биллэр. Бу куоракка кырдьаҕастар уонна оҕолор эрэ хаалбыттар. Онон, чөлүгэр түһэрэр үлэлэргэ Саха сириттэн кыттыахтара”, — диэтэ.
Украинаҕа хантараагынан барар дьон олорор сирдэринэн военкоматтан ыйыталаһалларыгар сүбэлээтэ.
“Хантараак түһэрсибит дьону барыларын анал эпэрээссийэҕэ ыыталлар диэн сыыһа саныыллар. Бастаан кинилэри үөрэтэллэр уонна үгүстэр Уһук Илиҥҥэ хаалаллар”, — диэн, Украинаҕа анал эпэрээссийэҕэ барарга сүүһүнэн сайабылыанньа киирэн сытарын туһунан эттэ. Ил Дархан хантараагынан барар дьону өйөөн, үгүс атын эрэгийиэннэр курдук, кинилэргэ 200 тыһыынча төлөбүрү оҥорон туһунан иһитиннэрдэ.
Надежда ЕГОРОВА, «Саха сирэ», edersaas.ru