Саха сирэ Донбасс куораттарыгар көмөлөһөр эрэгийиэннэртэн биирдэстэринэн буолла. Ил Дархан Айсен Николаев бэс ыйын 28 күнүгэр Донецкай Норуодунай Өрөспүүбүлүкэ Кировскай куоратыгар оробуочай сырыытын кэмигэр куорат дьаһалтатын кытары бииргэ үлэлиир туһунан сөбүлэһиигэ илии баттаабыта.
edersaas.ru
Cөбүлэһии быһыытынан, Саха Өрөспүүбүлүкэтэ Кировскай куорат нэһилиэнньэтин олоҕун укулаата көнөрүн уонна олохтоохтору төнүннэрэр туһугар экэниэмикэни уонна социальнай эйгэни түргэнник чөлүгэр түһэрэргэ көмөлөһүөҕэ.
Уһук Илин уокуругар Тутааччылар национальнай холбоһуктарын (НОСТРОЙ) сүрүннээччи, “Саха сирин тутааччыларын сойууһа” ассоциация генеральнай дириэктэрэ Айхал Габышев Саха сирин баһылыга Кировскай куоракка көмөлөһөр туһунан быһаарыытын өйүүр.
30 сыл устата Кировскай куоракка олохтоох тутуу уонна өрөмүөн ыытыллыбатахтарын кэриэтэ, онтон кэнники 8 сылга ДНӨ сэрии туругар олорбута. Бу кэм устата сөптөөх үбүлээһинэ суох куорат инфраструктурата наһаа эргэрбитэ. Билигин Кировскйга өрөспүүбүлүкэттэн дьиэ-уот, коммунальнай хаһаайыстыба уопуттаах исписэлиистэрин биригээдэтэ үлэлиир. Үлэни сүрүннүүргэ тэриллибит суһал ыстаап уонна оробуочай бөлөх Кировскай куорат дьаһалтатын кытары бастакы уочараттаах соруктары быһаарбыттара. Чөлүгэр түһэриллиэхтээх эбийиэктэргэ доруобуйа харыстабыла, үөрэх, сылааһынан хааччыйыы, уот уонна суол ситимнэрэ уо.д.а. киирэллэр. Үлэлэри оттук сезона уонна үөрэх дьыла саҕаланыан иннинэ түмүктүүр былааннаахтар.
«Кировскай куорат экэниэмикэтин уонна социальнай эйгэтин чөлүгэр түһэрии, олохтоохтор куораттарыгар төннөллөрүгэр көмөлөһүү дьоһун суолталаах уонна эппиэтинэстээх миссиянан буолар. Билиҥҥи усулуобуйаҕа куорат уонна Донецкай, Луганскай өрөспүүбүлүкэлэр олохтоохторо Арассыыйа уонна дойду олохтоохторун өйөбүллэрин билэллэрэ итиэннэ куттала суох эйгэҕэ олороллоро улахан суолталаах. Онон, Айсен Сергеевич ыллыктаах быһаарыыны кэмигэр ылынна, биһиги ону толору өйүөх тустаахпыт”, — диир Айхал Иванович.
«Саха сирэ», edersaas.ru