Кирилл Матвеев – Ангелина Файрушина аатынан ырыа күрэҕин кыайыылааҕа!

Бөлөххө киир:

Сунтаарга аан бастакытын «Ыллаа-ыллаа» өрөспүүбүлүкэтээҕи ырыа күрэҕэ тэриллэн 14 улуустан 69 ырыаһыт ырыа түһүлгэтигэр түмүстэ. Бэл, Өймөкөөн, Өлөөн курдук ыраах улуустартан кэлбиттэр.

edersaas.ru

Ырыа күрэҕэ икки күн устата тэриллэн Ырыа кыыспыт бары ырыалара ылланна. Дьүүллүүр сүбэҕэ анаан-минээн куораттан саха эстрадатын чаҕылхай сулустара Анастасия Готовцева, Милена Борисова уонна Людмила Спиридонова-Акимова кэлэн оҕо искусствотын оскуолатын дириэктэрэ Алексей Степановы Виктория Мойтохонованы кытта үлэлээтилэр. Бастакы күн киэһэтигэр Ангелина саҥа тахсыбыт ырыанньыга сүрэхтэннэ уонна кэлбит ыалдьыттар Сунтаар дьонугар эҕэрдэ кэнсиэртэрин бэлэх ууннулар.

Иккис күнүгэр 69 ырыаһыттан саамай бастыҥнара, чаҕылхайдара талыллан гала-кэнсиэркэ кытыннылар. Тэрээһини Эрчим уонна Розалина иилээн-саҕалаан ыыттылар. Ангелина Файрушина аатынан «Ыллаа, ыллаа» өрөспүүбүлүкэтээҕи күрэх кыайыылааҕынан Нам ырыаһыт уола Кирилл Матвеев буолан,  «Японец»  автоцентр салайааччыта Афанасий Алексеев  туруорбут 100.000 солк.  хаһаайынынан буолла! Эдэркээн уол Ангелина ырыатын кыра сылдьан күөх экраҥҥа көрөн, сөбүлээн, «Сахам сирэ» диэн ырыатын хайаан да хаһан эмэ толоруом диэн ыра санаатын таптыыр ырыаһытын түһүлгэтигэр ситиһиилээхтик ситистэ.

Оттон I-кы истиэпэннээх лауреатынан  Сунтаар Элгээйитин кэскиллээх ырыаһыта  Карина Попова  буолан улуус дьаһалтата, баһылык А.В.Григорьев туруорбут 50.000 солк. ылла. II истиэпэннээх лауреат  аатын Өлөөнтөн  Валерианна Новгородова  ылан Хадан нэһилиэгин «Оһуохай» СКК туруорбут 25.000 солк. бириистэннэ. III-с  истиэпэннээх лауреат  аатын Мэҥэ  Хаҥаластан  Мария Васильева ылан,  Валентин Файрушин 20.000 солк. туруорбут бирииһинэн наҕараадаланна.

I истиэпэннээх дипломант аатын  Бүлүүттэн  Тутукарова Анджела  ылан  Хадан нэһилиэгин дьаһалтата, баһылык Андрей Оконешников туруорбут 15.000 солк. бириистэннэ. II-с  истиэпэннээх дипломаҥҥа   Уус Алдан уола Никитин Андрейга   Сунтаар нэһилиэгин дьаһалтата, баһылык Эдуард Филиппов 10.000 солк. туттарда.  III-с  истиэпэннээх дипломаҥҥа  Сунтаар Кэмпэндээйитин күтүөтүгэр Николай Эверстовка   култуура эйгэтин үлэһиттэрэ туруорбут 5000 солк. бириэмийэлэринэн наҕараадаланна.

Ону кытта элбэх анал ааттар туттарыллан Ангелина аймахтарын-урууларын, кыргыттарын, Эрчим, култуура салалтатын, бииргэ үөрэммит доҕотторун, Виктория Мойтохонова,   Милена Борисова, Июлия Тихонова анал бириистэрин туттулар. Бу тэрээһин Ырыа Кыыс бэйэтин майгытын, ырыаларын курдук, өр сылларга үлэлээн ааспыт «Бартыһаан» КК олус истиҥник уонна иһирэхтик ааста, сылдьыбыт эрэ бары астынна!

Мария Кобельянова-Тускулаана, «Эдэр саас» сайтка анаан

+1
0
+1
0
+1
0
+1
0
+1
0
+1
0
+1
0