«Арассыыйа улуу ааттара» бырайыак чэрчитинэн, Дьокуускай куорат аэропордугар ким аатын иҥэрэр туһунан ыйытыкка өрөспүүбүлүкэ олохтоохторо этиилэрин көхтөөхтүк киллэрэллэр.
edersaas.ru
Эрдэ биллэриллибитин курдук, этиилэр Кыайыы волонтердарын пууннарыгар: «Синема центр» киинэ тыйаатыгар, «Арассыыйа – мин историям» мультимедийнэй историческай пааркаҕа, аэропортка уонна Саха сирин Уопсастыбаннай палаататыгар түмүллэллэр. Ыйытыкка үс түһүмэҕинэн элбэх киһи аата киирдэ. Ол иһигэр, Эллэй Боотур, Тыгын Дархан, Сэһэн Ардьакыап, Манчаары Баһылай, Өксөкүлээх Өлөксөй, Былатыан Ойуунускай, Гавриил Ксенофонтов, Марк Жирков, Федор Охлопков, Вера Захарова, Владимир Ларионов, Валерий Кузьмин, Роман Дмитриев, Михаил Николаев уо.д.а.
Кирилл Герасимов, Саха өрөспүүбүлүкэтин композитордарын сойууһун бэрэссэдээтэлэ, Арассыыйа композиторарын сойууһун чилиэнэ, ускуустуба үтүөлээх үлэһитэ:
— Марк Жирков сахаттан бастакы идэтийбит композитор, музыковед, фольклорист, уопсастыбаннай диэйэтэл. Бүлүү казагын уола Дьокуускайдааҕы реальнай училищены, Чайковскай аатынан Москватааҕы судаарыстыбаннай консерватория композиторскай салаатын бүтэрбитэ. Дьокуускайга муусука оскуолатын, муусука училищетын, судаарыстыбаннай национальнай хуору тэрийбитэ, норуот ырыаларын нотаҕа киллэрбитэ, элбэх ырыаны айбыта, олоҥхону опера оҥорон сыанаҕа туруорбута, быһата, саха музыкальнай ускуустубатын төрүттээбитэ. Саха тылынан уус-уран айымньытын уонна муусука үстүрүмүөннэрин чинчийэн үөрэппитэ. Дьокуускай аэропордугар аатын иҥэриэхтэрэ диэбэтэрбин даҕаны, саха билиҥҥи көлүөнэ дьоно, чуолаан эдэр ыччаттар, биллиннэр диэн интэриэһи көбүтэр сыалтан, мин Марк Николаевич Жирков аатын киллэрэбин.
Куоластааһын төрдүс түһүмэҕэ сэтинньи 12 – 30 күннэригэр ыытыллар. Онуоха ким кыттыан баҕалаах великиеимена.рф сайтка киирэн уопсай испииһэктэн Дьокуускай к. аэропордун булан, «биир куолас – биир аэропорт – биир аат» принцибинэн киһи аатын талар. Эбэтэр сөмөлүөт бортугар, эбэтэр Кыайыы волонтердарын пууннарыгар анкыата толорор. Тапталлаах куораппыт аэропордугар ким аата иҥэриллибитэ ахсынньы 5 күнүгэр биллиэҕэ.
Раиса СИБИРЯКОВА, «Саха сирэ» хаһыат, edersaas.ru