Бүгүн Ил Дархан Айсен Николаев коронавирус дьаҥын бохсорго ылыныллыбыт хааччахтыыр дьаһаллары уларытар туһунан Ыйаахха илии баттаата. Ол туһунан СӨ Бырабыыталыстыбатын Бэрэссэдээтэлин бастакы солбуйааччытын эбээһинэһин толорооччу Кирилл Бычков маннык быһаарда:
edersaas.ru
— Сылы эргиччи суолунан сибээһэ суох улуустарга хааччахтар үгүстэрэ уһулуннулар. Бүгүҥҥүттэн 50-тан тахсалыы киһи мустар тэрээһиннэрэ эрэ бобуулаахтар.
Ыарыһах ахсаана элбээбитинэн, Покровскай куорат эбии хааччах эрэсиимэ киллэриллибит оройуоннар испииһэктэригэр киллэрилиннэ. Ол аата, хааччахтыыр миэрэлэр Покровскайга ыам ыйын 31 күнүгэр диэри уһатылыннылар.
Дьокуускай, Жатай, Аллараа Бэстээх, Тиксии, Покровскай,Нерюнгри, Мииринэй, Ленскэй оройуоннарыттан ураты улуустарга эргиэн тэрилтэлэрэ, ырыынактар үлэлииллэрэ көҥүллэнэр. Ол гынан баран, үлэһиттэр маасканы уонна бэрчээккэни хайаан даҕаны үлэ кэмигэр кэтиэхтээхтэр. Нэһилиэнньэҕэ өҥөнү оҥоруунан дьарыктанар тэрилтэлэр: парикмахерскайдар, салоннар эрдэ сурутуунан, дьону муспакка эрэ үлэлииллэрэ көҥүллэнэр.
Дьокуускайга, Жатайга, Аллараа Бэстээххэ, Тиксиигэ, Нерюнгрига, Мииринэйгэ, Ленскэйгэ уонна Покровскайга бэйэни хааччахтаныы эрэсиимэ ыам ыйын 31 күнүгэр диэри уһатыллыбыт. Ол гынан баран, иис тэрилтэлэрэ, химчисткалар уонна килийиэни кытта алтыһыыта суох өҥөнү оҥорор тэрилтэлэр үлэлииллэрэ көҥүллэнэр.
Арыгыны көҥүл атыылааһын ыам ыйын 31 күнүгэр диэри хааччахтаах.
Дьиэттэн олорон үөрэнии 2019/2020 үөрэх дьыла бүтүөр диэри уһатылынна.
Ыам ыйын 31 күнүгэр диэри нэһилиэктэр икки ардыларыгар дьону тиэйии (такси уонна оптуобустар) бобуллар. Өлүөнэ өрүскэ «Дьокуускай — Аллараа Бэстээх», «Хаҥалас — Суотту», «Суотту — Хаҥалас» , Алдан өрүскэ «Мэҥэ Алдан — Кэскил», «Кэскил — Мэҥэ Алдан» маршрутунан дьону тиэйии ити болдьоххо диэри бобуллар.
Алдан куоракка, Ленинскэй бөһүөлэккэ ыам ыйын 12 күнүттэн харантыын эрэсиимэ уһуллар, ол эрээри, бэйэни хааччахтаныы эрэсиимэ Алдан улууһугар барытыгар хаалар.
Дьокуускайга, Жатайга, Аллараа Бэстээххэ, Тиксиигэ, Нерюнгригэ, Мииринэйгэ, Ленскэйгэ уонна Покровскайга успуордунан дьарыктана соҕотох тахсыы көҥүллэнэр. Ону таһынан, дьиэ кэргэнинэн күүлэйдээһин эмиэ бобуллубат, ол гынан баран, дьон икки ардыгар 1 миэтэрэ тэйиччи сылдьар булгуччулаах.
Саха сиригэр хааччаҕы сыыйа төлөрүтүү саҕаланна. Өскөтүн балаһыанньа тупсан бардаҕына, хааччах болдьоҕо кылгыан сөп.