СӨ Бырабыыталыстыбатын Бэрэссэдээтэлин бастакы солбуйааччы Кирилл Бычков Нерюнгри оройуонугар сырыытын кэмигэр Нерюнгри куорат “Р” кыбартаалын кэлимсэ тутуу бырайыагын олоххо киллэриини дьүүллэстэ.
Мунньахха Уһук Илини уонна Арктиканы сайыннарыыга миниистирин солбуйааччы Анатолий Бобраков, “Уһук Илин уонна Арктика сайдыытын корпорацията” АУо генеральнай дириэктэрин бастакы солбуйааччы Эльвира Нургалиева, өрөспүүбүлүкэ тутууга миниистирэ Павел Кылатчанов, “Колмар УК” ХЭТ генеральнай дириэктэрэ Артем Левин уо.д.а. кытыннылар.
Бастакы вице-премьер иһитиннэрбитинэн, Нерюнгри куоракка 2023 сылга диэри уопсайа 106,7 тыһ. кв. м иэннээх элбэх кыбартыыралаах 11 дьиэ “Р” кыбартаалын үлэҕэ киллэриэхтээхтэр. Бырайыагы “Колмар груп” АУо көҕүлээбитэ.
“Бу “Уһук Илиҥҥи кыбартаалга” аныгы дьиэлэри тутан таһаарыыга тута дьыссааттар, оскуолалар, сквердэр уонна социальнай инфраструктура атын эбийиэктэрэ тутуллаллар. Манна дьоҥҥо олороллоругар тупсаҕай буолуоҕа”, — диэн Кирилл Бычков бэлиэтээтэ.
“УК” Колмар” ХЭТ генеральнай дириэктэрэ Артем Левин этэринэн, бүгүн бу тэрилтэ бырайыагынан тутуу барыахтаах учаастагын дуогабарын түһэрсиигэ үлэ ыытылынна, бу сир-уот былаанын, уотун-күөһүн, уунан, сылааһынан хааччыйыыны торумнаатылар, бастакы үс дьиэни тутууга көҥүлү ыллылар.
Дьиэ-уот тутуутугар бу инвестиционнай бырайыагы олоххо киллэрэр туһунан 2019 сыллаахха илии баттаспыттара. Бу докумуоҥҥа олоҕуран “Стимул” бырагыраамаҕа кыттарга сайаапка ыытыахтара. Арассыыйа тутууга министиэристибэтэ от ыйыгар сүүмэрдээһини ыытыахтаах.
“Неюнгри – Уһук Илиҥҥэ таас чох бөдөҥ кластера. Биһиги бары күүспүтүн маннык бөдөҥ кэлимсэ тутуулары ыытыыга ууруохтаахпыт. Эрэгийиэммит бырамыысыланнаһын салаатын үлэһиттэрэ олороллоругар маннык сыһыаннаһыы олорорго табыгастаах усулуобуйаны тэрийиэҕэ”, — диэн мунньаҕы СӨ бырабыыталыстыбатын Бэрэссэдээтэлин бастакы солбуйааччы Кирилл Бычков түмүктээтэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: тустаах саайтан