СӨ Бырабыыталыстыбатын бэрэссэдээтэлин бастакы солбуйааччы Кирилл Бычков Усуйаана уонна Дьааҥы улуустарыгар баар Күчүс диэн көмүһү хостуур сиргэ кыра кыамталаах атомнай ыстаансыйаны тутуу уонна инфраструктураны тэрийии бырайыагынан суһал ыстаап мунньаҕын ыытта.
Бастакы вице-премьер кыра кыамталаах атомнай ыстаансыйаны тутууну Усуйаана уонна Дьааҥы улуустарын социальнай-экэнэмиичэскэй инники сайдыыларыгар суолталааҕын бэлиэтээтэ. Инфраструктураны тэрийии өрөспүүбүлүкэ арктическай сиригэр олорор дьонун олоҕун хаачыстыбатын биллэ тупсарыаҕа.
«Русатом Оверсиз» кыра кыамталаах оборудованиелары бырайыактааһыҥҥа, контрактацияҕа уонна тиэрдиигэ вице-бэрэсидьиэнэ Олег Сиразетдинов ыстаап үлэлэрин боротокуолларын туолуутун иһитиннэрдэ. Ыстаансыйаны тутууга наадалаах таһаҕаһы тиэйии, кадастр, биэрэги бөҕөргөтүү үлэлэрин боппуруостара көрүлүннүлэр. Усть-Куйга бөһүөлэгин хаачыстыбалаах уунан хааччыйыы уонна айылҕаҕа кутталы суоһаабат туһунан боппуруостарынан СӨ ОДьКХ уонна энергетикэҕэ министиэристибэтэ дьарыктанар.
Мунньах түмүгэр Усть-Куйга — Силэҥнээх — Тирэхтээх — Депутатскай хайысханан ВЛ 110 (220) тутуу боппуруостарын ситэ быһаарсарга сорудахтаатылар. Итиэннэ Усуйаана улууһун сирин баайын үөрэтэргэ үлэни саҕалыыр наадалааҕын бэлиэтээтилэр.
Атомнай ыстаансыйаны тутуу Усть-Куйга, Депутатскай уонна бырамыысыланнас тэрилтэлэрин уотунан хааччыйыаҕа. Биир сүрүн туһанааччынан Күчүстээҕи көмүһү хостуур сир буолуоҕа. Манна опеаторынан «Селигдар» ПАО буолар. Бу туһунан Ил Дархан уонна Бырабыыталыстыба дьаһалтатын пресс-сулууспата иһитиннэрэр.
Мария Васильева хаартыската, СИА.