СӨ Бырабыыталыстыбатын бэрэссэдээтэлин бастакы солбуйааччы Кирилл Бычков Арассыыйаҕа Тутуу министиэристибэтин мунньаҕар өрөспүүбүлүкэ инфраструктурнай сайдыытыгар бүддьүөттэн кирэдьиит ылыыга анаммыт бырайыактары көрдөрдө. Өрөспүүбүлүкэ инфраструктурнай бырайыактары ылыы методикатын бырайыагар сөп түбэһиннэрэн икки сайаапка түһэрилиннэ: лимит чэрчитинэн уонна куонкурус чэрчитинэн. Вице-премьер дакылаатынан өрөспүүбүлүкэҕэ анаммыт лимит чэрчитинэн 4161,1 мөл солкуобайдаах Дьокуускайга уонна Нерюнгрига ыытыллыахтаах тутуу бырайыактарын сайаапкаҕа киллэрбит. Бу бырайыактары олоххо киллэрдэххэ «Жилье» эрэгийиэннээҕи бырайыак толоруутун хааччыйыаҕа. Санатан эттэххэ, бу бырайыак 2030 сылга диэри сыллааҕы 832 тыһ. кв.м. көрдөрүү ситиһиллиэҕэ.
Дьокуускайга «Звезднай» микрооройуон бырайыагын олоххо киллэрэргэ урукку Воинскай чаас сиригэр уу уонна гаас ситимин тардыы, уот подстанциятын саҥардыы, сылааһы хааччыйар хочуолунайы, ону тэҥэ 315 миэстэлээх оҕо уһуйаанын тутуу ирдэнэр. Кирилл Бычков этэринэн, бырайыак 11 тыһыынча киһи олороругар аналлаах 264,8 тыһыынча кв. м. дьиэ тутуллан олоххо киирэригэр көмө буолуоҕа.
Нерюнгри куорат «Р» түөлбэтигэр уу уонна уот магистралларын тардыы, баар сылааһынан хааччыйар структуралары саҥардыы 2024 сылга диэри 59,0 тыһ. кв. м дьиэни киллэриини хааччыйыаҕа, онтон кэлэр сылларга 66,6 тыһ. кв.м эбии киллэриигэ олук буолуоҕа.
Сайаапкаҕа ону таһынан 200 миэстэлээх дьиэни уонна Жатайдааҕы судоверфь исписэлиистэригэр анаммыт элбэх кыбартыыралаах дьиэ тутуутун бырайыага киирдэ.
Оттон куонкурус чэрчитинэн түһэриллэр сайаапкаҕа Өлүөнэ өрүһү туоруур муоста тутуутун үбүлээһиҥҥэ бырайыак түһэрилиннэ.
Өрөспүүбүлүкэ сайаапкаларын сотору кэминэн Арассыыйа Бырабыыталыстыбатын бэрэссэдээтэлин солбуйааччы Марат Хуснуллин салайар Эрэгийиэннэр сайдыыларын ыытар Бырабыыталыстыба президиумун хамыыһыйата көрүөҕэ.
«Саха сирэ» хаһыат, edersaas.ru
Хаартыска sakha.gov.ru