Кирилл Бычков Чапаевоҕа тахсыбыт баһаар кэннэ Өктөмҥө дьиэлэри тутууга үп көрөр туһунан боппуруоһу туруорда.
Муус устар 15 күнүгэр бастакы вице-премьер Кирилл Бычков салалтатынан “Төрөөбүт куораттарбыт уонна сэлиэнньэлэрбит” бырайыак биэдэмистибэлэрдээҕи хамыыһыйатын оробуочай бөлөҕүн мунньаҕа буолла.
Саха Өрөспүүбүлүкэтин Бырабыыталыстыбатын уонна СӨ Ил Түмэнин бииргэ үлэлэрин түмүгэр “Мин Сахам сирэ XXI үйэҕэ” үтүө дьыала уопсай өрөспүүбүлүкэтээҕи хамсааһын чэрчитинэн 2021 сылга уопсай лимиитэ 166-тан 230 мөл солкуобайга диэри улаатта.
Бу бырагыраама чэрчитинэн үбү тыырыы боппуруоһун көрүүгэ Кирилл Бычков Хаҥалас улууһугар муус устар 7 күнүгэр тахсыбыт иэдээннээх баһаарга болҕомтону туһаайда. Баһаартан дьон олоҕо быһынна, элбэх кыбартыыралаах дьиэ уокка былдьанна. Бастакы вице-премьер бу баһаартан сылтаан ыксаллаах балаһыанньа үөскээбитин эттэ. Өктөмҥө 20 мөл солкуобай суумалаах түөрт кыбартыыралаах икки олорор дьиэни тутуохха наада. Хаҥалас улууһа кыттыгас үбүлэһэргэ сөбүлэһэр.
Кирилл Бычков СӨ тутууга миниистирэ Павел Кылатчановка “Мин Сахам сирэ XXI үйэҕэ” үтүө дьыала бүтүн өрөспүүбүлүкэтээҕи хамсааһын суотугар Өктөмҥө дьиэни тутууга үп көрөрөгө сорудахтаата.
Бу боппуруос Саха сирин Тутууга министиэристибэтинэн торумнанан, биэдэмистибэлэр икки ардыларынааҕы хамыыһыйаҕа суһаллык көрүллүөҕэ.
Ону тэҥэ бу хамыыһыйа чилиэннэрэ Нам улууһун Маймаҕа нэһилиэгин “Маймаҕа сэл. култуура-успуорт комплексын тупсаҕай оҥоруу” бырайыагар 1,4 мөл солкуобай кээмэйдээх үбү биэрэргэ быһаарда.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Хаартыска:тустаах саайтан. Мария Васильева түһэриитэ.
Бэлэмнээтэ Женни Стрюкова.