Кирилл Алексеев тэрийбит экологическай аахсыйата быйыл үһүс сылын ыытылынна
Бүгүн «Сахамедиа» иһитиннэрэр-биллэрэр холдинг кэлэктиибэ «Сибиинньэлэр — суохтар!» диэн айылҕаҕа тахсан, бөҕү-саҕы хомуйар экологическай аахсыйаны тэрийэн ыытта.
edersaas.ru
Тэрилтэ бу үтүө тэрээһини үһүс сылын тэрийэр. Бастакы аахсыйа 2016 сыл ыам ыйын 20 күнүгэр Экология сылынан сибээстээн, Покровскай тракт 15 км сүрэхтэммитэ. Онно тэрилтэ салайааччыта Кирилл Алексеев: «Бу тэрээһини «Сахамедиа» холдинг үгэс быһыытынан сыл аайы ыытыаҕа«, — диэн бэлиэтээбитэ. Былырыын бэс ыйын 1 күнүгэр Көтөр фабрикатын мырааныгар тиийэн бөҕү-сыыһы хомуйбуппут. Онно «Сахамедиа» пресс-киинэ төрүттэммитэ иккис сылын уонна тэрилтэ генеральнай дириэктэрэ Кирилл Алексеев 48 сааһын экологическай аахсыйа субуотунньугунан бэлиэтээбиппит. Оччолорго ким билиэй, эһиил баччаҕа ытыктыыр салайааччыбыт биһиги аттыбытыгар аны суох буолуо диэн…
Быйыл үгэс быһыытынан үһүс сылбытын экологическай субуотунньугу ыыттыбыт. «Сахамедиа» пресс-киинэ номнуо үһүс сылын туолла. Оттон Кирилл Алексеев тыыннааҕа буоллар, 49 сааһын бэлиэтээн, былырыыҥҥы курдук аттыбытыгар күлэ-үөрэ олоруо этэ…
Тэрилтэ каадырга уонна тэрийэр үлэҕэ отделын салайааччыта Светлана Аммосова бэлиэтииринэн, быйыл субуотунньуктуур сири буларга уустуктар үөскүү сырыттылар. Ол курдук, чугастааҕы тыаларга барыларыгар субуотунньуктар ыытыллан, аны бөх хомуйар сири көрдөөһүн боппуруоһа үөскүү сылдьыбыт. Бүлүүлүүр уонна Намныыр трактары кыйа айаннаатахха, бөх баара чахчы бөҕө буоллаҕа. Биһиги Бүлүүлүүр трагы таллыбыт.
— Гектар курдук сиргэ 200 киилэттэн тахса бөҕү хомуйан, кэлэктиип тахсыылаахтык үлэлээтэ. Кирилл Алексеев саҕалаабыт өссө биир үтүө дьыалата — экологическай аахсыйа үтүө үгэскэ кубулуйда. Биһиги бүгүн «Сахамедиа» холдинг пресс-киинигэр кини сырдык кэриэһигэр анаммыт хаартысканан быыстапканы астыбыт уонна Кирилл Алексеев төрөөбүтэ 49 сылын экологическай субуотунньук тэрийэн бэлиэтээтибит, — диэн тэрилтэ генеральнай дириэктэрэ Роман Мандзяк эттэ.
Биһиги сылдьыбыт сирбитигэр хаарбах массыына тобоҕо, буочука бөҕө кыстанан сытар эбит. Эр дьоммут сүрүннээн улахан бөхтөрү таһыыга сырыттылар. «Сахамедиа» холдинг генеральнай дириэктэрин солбуйааччы Афанасий Ноев уонна «Якутия» хаһыат эрэдээктэрэ Федор Григорьев ыарахан үлэни кыайа-хото туттулар.
«Саха сирэ» хаһыат суруналыыһа Раиса Сибирякова да кинилэртэн хаалсыбата — элбэх бөх хааламмыт куулун сүкпүтүнэн сырытта.
Сүрүннээн дьон тыаҕа шашлыктыы тахсан баран, муос иһиттэрин хомуйбакка быраҕаттаабыттара үгүс. Ол быыһыгар бэрт урукку (сэбиэскэй кэмтэн ыла) салапаан тобоҕо номнуо сири кытта сир буолан эрэрэ элбэҕэ диибин диэн. Киһи хостоотоҕуна бытарыйа сылдьар. Кэнсиэрбэ тимир бааҥката, таас бытыылка үлтүркэйэ буолунай. Билигин маннык бытыылканы булбаккын. Ол оннугар — пластиковай. Хата, оннук бытыылка аҕыйах. Суоҕун кэриэтэ. Биир бэйэм туттуллубут хоппуруон ботуруон хаҕын бэрт элбэҕи хомуйдум. Бу барыта — сэбиэскэй кэм кэрэһиттэрэ.
Тэрилтэбититтэн отучча киһи мустан (дьоммут үксэ уоппускаҕа сылдьаллар), 60 куул бөҕү хомуйдубут. Балтараа чаас иһигэр аҕалбыт куулларбытыгар барытыгар бөҕү-саҕы хаалаан кэбистибит.
Бу курдук, хас биирдии киин куорат тэрилтэтэ ойуурга тахсан, экологическай субуотунньугу тэрийдэҕинэ, айылҕабыт бу суруналыыс Георгий Татаринов турар тыатын курдук өрүү ыраас, сырдыгынан чаҕылыйа туруо туруо этэ.
Үлэбитин үмүрүтэн баран, тэрилтэбит салалтата күндүлээбит шашлыгын амсайан, айылҕаҕа тото-хана аһаан, салгын сиэн астынан кэллибит.
Урукку салайааччыбыт Кирилл Алексеев олохтообут үтүө үгэһэ сыл аайы ыытыллар буолан, эһиил кини төрөөбүт күнүгэр — 50 сылын туолуутугар экологическай субуотунньукка өссө элбэх буолан кэлиэхпит диэн санаалаах тарҕастыбыт.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.