Кулун тутар 18 күнүгэр Ил Дархан Айсен Николаев өрөспүүбүлүкэ социальнай-экэнэмиичэскэй бигэ туруктаах буолуутун хааччыйыы туһунан мунньаҕы тэрийэн ыытта. Мунньахха Ил Түмэн дьокутааттарын, бөдөҥ федеральнай тэрилтэлэр, былаас уорганнарын, биисинэс уонна уопсастыбаннас бэрэстэбиитэллэрин ыҥыран, кэлэр ыйдарга бары күүһү түмэн, түмсэн, сөпкө дьаһанары, үлэлиири торумнаата.
—Кытаанах сааҥсыйалары киллэрии усулуобуйатыгар биһиги бытааран, олорон биэриэ суохтаахпыт. Урукку курдук үлэлиир кэм ааста, бука бары уларыйыахпытын, бэйэ бодобутун тардыныахпытын наада. Хас биирдиибит бэйэбит миэстэбитигэр, бэйэбит дьыалабытыгар муҥутуур көдьүүстээхтик, туһалаахтык үлэлиэхтээхпит. Биһиги бары күүһү түмэн, бииргэ үлэлиирбититтэн өрөспүүбүлүкэбит инникитэ тутулуктаах.
Хас биирдии киһи, дьиэ кэргэн туруктаах буоларын туһугар, кинилэри, биисинэһи, оҥорон таһаарыыны көмүскүүр, көмөлөһөр туһуттан, быһаарыныылары олус түргэнник, чуолкайдык уонна көдьүүстээхтик ылыныахтаахпыт. Дьыаланы, докумуону оҥорууну уһатар-кэҥэтэр, соһор сатаммат. Онтон сиэттэрэн, бырабыыталыстыба, ситэриилээх былаас уорганнара тохтоло суох үлэ эрэсиимигэр киирэллэр. Экэниэмикэ билиҥҥи усулуобуйатыгар кыра сүтүктээх тахсары ааһан, өрөспүүбүлүкэ сайдыытыгар олук ууруохтаахпыт, — диэн Айсен Николаев эттэ.
Онон билигин үлэлии турар туох баар бырагыраамалар, национальнай бырайыактар оннунан хаалаллар, салгыы үлэлииллэр. Сотору кэминэн өрөспүүбүлүкэ судаарыстыбаннай бүддьүөтүн кириисис кэмигэр уларытар туһунан сокуон барыла Ил Түмэҥҥэ барыаҕа.
Тыа хаһаайыстыбатын, оҥорон таһаарыыны, авиацияны, аччыгый биисинэһи, уо.д.а. өйүүр миэрэлэр ылыллыахтара, чэпчэтиилээх кирэдьииттэр, субсидиялар бэриллиэхтэрэ. Маны тэҥэ үлэтэ суох хаалбыт дьоҥҥо, кыаммат ыалларга, уо.д.а. көмө быстыбат.
Кириисис кэмигэр экэниэмикэ бары салааларын уонна нэһилиэнньэни өйүүргэ барыта 12 миллиард солкуобай көрүллүөҕэ.
Ангелина Васильева, “Саха сирэ” хаһыат, edersaas.ru
Хаартыска: СИА.