«Роспотребнадзор» Саха сиринээҕи управлениета иһитиннэрбитинэн, балаҕан ыйыгар тумуу, кириип ыарыыларынан ыалдьыы ахсаана элбээн эрэр. Ол курдук, ыалдьыбыт дьон 55%-на Дьокуускай куоракка бааллар.
Бүгүҥҥү туругунан, 27 тыһыынча киһи, ол иһигэр 17 тыһыынча улахан дьон кирииби утары “Совигрипп”, “Ультрикс квадри” быһыылары ылбыттар. “Роспотребнадзор” сэрэтэринэн, ковид уонна кириип ыарыыларынан ыалдьыы тэҥинэн элбээтэҕинэ, доруобуйаҕа улахан охсуулаах буолар, эпидемиологическай балаһыанньа өссө уустугурар. Онон нэһилиэнньэни кирииби утары быһыыны ыларга ыҥыраллар.
Оҕолорго 6 ыйдарыттан биэриэхтэрин сөп, хат дьахталлар, олоҕурбут ыарыылаах дьон ылаллара көҥүллэнэр. Хат дьахтар кириибинэн ыарыйдаҕына, оҕото сайдарыгар күчүмэҕэйдэри үөскэтэр. Бу олус сыстыганнаах, доруобуйаҕа улахан охсуулаах, ыраханнык ааһар ыарыы. Кырдьаҕастар иммуннай систиэмэлэрэ мөлтөөбүтүнэн, оттон оҕолор иммунитеттара бөҕөргүү илигинэн, бу ыарыыны көрсө илик буолан, ыараханнык аһардаллар.
Онон улахан дьон 60%-ра (ол иһигэр 217 тыһыынча оҕо, 363 тыһыынча улахан дьон), ыарыыга кэбэҕэстик бэринэр дьон 75%-ра кирииби утары быһыыны ылыахтаахтар. Кириип вируһун утары антибиотигы иһии туһата суох диэн “Роспотребнадзор” управлениета иһитиннэрэр.
Ангелина Васильева, “Саха сирэ” хаһыат, edersaas.ru
Хаартыска: kotobum.ru