“Саха” НКИХ ханаалыгар «Талбан» биэриигэ үһүс күнүн коронавирус дьаҥын тула кэпсэттилэр.
edersaas.ru
Бүгүн ыарыыны сэрэтии, эмтэнии, оҕолору хайдах эмтиир туһунан сэһэргэстилэр.
СӨ Доруобуйа харыстабылын министиэристибэтигэр нэһилиэнньэҕэ медицинскэй көмөнү оҥорор Департамены салайар Вера Тарасова кэпсээбитинэн, коронавируска улуус уонна өрөспүүбүлүкэ суһал ыстааптарын дааннайдара атын буолуон сөп. Тоҕо диэтэххэ, тус-туһунан тэрилтэлэр ыалдьыбыт дьону бэлиэтиир, ааҕар ньымалара араастаах. Холобур, ыалдьыбыт сибикитэ суох дьон атын куодунан бэлиэтэнэллэр, пцр анаалыһа көрөдөрбөтөх дьон эмиэ атын куодунан статистикаҕа киирэллэр эбит.
Дьаҥтан тыыннара быстыбыт дьон өлбүт күннэриттэн испииһэккэ киллэриллибэттэр. Бастатан туран, биир ыйдаах патологоанатомическай үөрэтиини ааһан баран, коронавируһунан ыалдьыбыта дьиҥнээхтик бигэргэтилиннэҕинэ эрэ ааҕыллар.
Өрөспүүбүлүкэтээҕи килиниичэскэй балыыһа бырааһа Альбина Петрова бэлиэтээбитинэн, ковид син биир көннөрү кириип курдук саҕаланар. Ол эрээри, кириипкэ киһи нэдиэлэ кэриҥэ кэнниттэн сыыйа чөлүгэр түһэр. Оттон коронавируһунан ыалдьыбыт дьоҥҥо, организмнара вируһу кытары охсуһар белоктары таһаарар. Бу белок аһары элбээтэҕинэ, уорганнар ноҕуруускаланыахтарын сөп.